Read Sumi Naga LESHELE 66 Bible Online

LESHELE 66 - Sumi Naga bible

LESHELE 66

¹[66] O timiqo, alokivishi igha Alhou sheqhelo!

²Pa jekipipushi shipililo; akimtheshi sheqhekeu pa tsulo!

³Alhou vilo ishipilo “Nono mlaqhi keuye kiutoi akumzapu kela! Okukaye shishe kije kehu oghumiye akumsa launo ozulo pishiqho ke.

⁴Ayeghilo akemi kumtsuno omllake; panonguno osheqhe alepheke, panonguno osheqhe oje shipilike.”

⁵Ighieno Alhou no kiu mlavetsukeno julo, timi gholo pano mlaqhikeu akumzapuke.

⁶Pano azughi pesu ayeghi shivetsu; nipuasuye apukhu lono aghoki kathasu wuke. Pano hitoike ghenguno ninguye alokivishike.

⁷Pano pa kumto pesu pulhapuju ayehpeke eno pa nhethino ashiayehqo jukuto ani. Hekibidemi khumu pa shou hebide ipeghimlae.

⁸Ashiayeh kutamiqo, niLhou sheqhelo, nonguno sheqhekeu chilu pelo.

⁹Pano kuxumi gholo nipelo ngolupe eno nipukhu pelo nekiphe veqhi pemoe.

¹⁰O Alhou, nono ningu ghukeju keulo sujuake, tsandiyi ami pesu ghu kimthe ketoi nono ningu ghu kejuke.

¹¹Nono ningu pelo alichhelo ikiqi ilope eno akho kimshi pesu ningu shou betsuke.

¹²Nono nighumi pelo ni nedaqodapeke; ninguye azulo putsuju ami lono ghujuke, ikemu itehiye nono a-a kivilo nisaghivae.

¹³Ino lhoxu pitino mllakepu gho pesu okilo sughini; ino kiu shiniepi piqhive akeno tipau omllani.

¹⁴Ino shilusa ake lono kiu otsuniepi pikeno ti otsunike.

¹⁵Okipiti khachelo pitipenike ino bheri pesu omllani; Ino amshitsu ngo anetsu heqhi tsuni eno tipau pitikeu michhi atsutsulo iku peni.

¹⁶Nongu Alhou gihu chekeqo kumtsu ighieno inilo, pano ighenguno kiu shitsu keno khenike.

¹⁷Ikuphupeniye ino pa vilo ighamu kuke; ino ale phepesu pa sheqhe.

¹⁸Ino ixineqo palokutoveke aye AMPEU ye ikighini initsumoni cheke.

¹⁹Ikemu Alhou ye kuchouno ikighini chilutsuke; pano ikighini sutsa kudau kugho ighitsu ke.

²⁰Ino Alhou sheqhe ani, kughengu paye ikighini peivetsumoe, momu pawu iqemokeu kikimiye ilauno ikhiluve mphike!