Read Sumi Naga LESHELE 69 Bible Online

LESHELE 69 - Sumi Naga bible

LESHELE 69

¹[69] Ixalulo, O Alhou! Kughengu azuno ikuo kutolo ikughivae.

²Niye anibalo iqe ilochea eno apukhu nekulupu yeghi shicho kuhae; Niye azu kutho kudau ilochae eno azu fukukuchono iputsu qhiveni chea.

³Niye ikuphulopi ighamuku pikeno angavae ikughokino qhaivae. ILhou lajukhe keno inhethi chuchu miyive.

⁴Kutsazushi imithikemino ikutsulo asa akeu nguno akichiu anike. Ighumino ishou akimki tsa picheni panonguye mutotoike eno ipithi venishi ani. Ino puka moamu tipau lochile anipeke.

⁵O Alhou, nono ighuzu-nikha ithi ani, ikipimiye olauno kusupesu puamoe.

⁶Khunono opukhu cheni keno tipaqo shou ipelono akukujo sughi pekevilo; O aqokitikhi shou AMPEU Alhou! Khunono omlla cheni keno tipaqo shou kujomza kepu ipelo sughi pekevilo, O Israilmi Lhou!

⁷Oje ghenguno timino hitoi itha igha ani eno niye akukujono ikuzu pholuvae.

⁸Niye ithikuzumi gholo inami toi auvae, nibolomi gholo inami tou auvae.

⁹Ochineki lo wuno mlla nishi keuno ipitipuza ani; othaigha keu hu ishou ikiqi ikughi ani.

¹⁰Ino kumvuno ilikhi ikughape aqhokigheu shi; tihuno timino ithaighake;

¹¹Ino qa-mlokeu phimini pepuke eno panonguno ijunuqhie.

¹²Alaghilalo panonguno ighili kugha, eno shokumzumino ighili ale iqino pheke.

¹³Ikemu ighenguno niye olau inikhuni, O AMPEU; Odo kivi lono ikhochiletsulo, O Alhou. Okikimiye kije ghenguno ikhochile tsulo, kughengu nono xaluni keu piqhi puanike.

¹⁴Anibalo ijoilo chekeu lono ixaphelo; ighumi launo ixaphelulo, azu kutho lono ixaphelo.

¹⁵Azukighide pelo ishou ikughi peke vilo, momu azukutho pelo imnove pekevilo, momu akumokilo ilove pekevilo.

¹⁶Ikhochilelo, O AMPEU, kughengu owu iqemokeu kikimiye ye aloke; nono qhuivulai keu kiqi lono ilau tsughu ighilo!

¹⁷Oqeu launo ogi kusuluve kevilo; niye shishe shilusa ani, itehino ikhochile tsulo!

¹⁸Ilau ighilo eno ixalulo; ighumi launo ixachilelulo!

¹⁹Kishi ipiputha ani keno nono ithi ani, ikukujo, igihumokeu kumtsu ithi ani; Nono ighumi kumtsu ithi akhanike.

²⁰Ipiputhakeuno imlo ghujupu shi vetsua eno niye amloksa shiani. Ikupu nimalaye lajuke, ikemu khumu ithumlae.

²¹Kughou ino muzuthini keno tughu pesu itsu, ino tughuthi aye panonguno akiqhizu ipiyeke.

²²Panonguno achuqu kivi kutopuakeu huno panoqo shipsave pelo; Panonguno akimthe ghulhu shikeu no panoqo meluve pelo.

²³Panongu nhethi kighicheve tsulo, panongu ghutsughiye miqe mileive pelo.

²⁴Ologhu kighide panoqo shou lepu kulo; oxu kighideno panoqo hathaluve pelo.

²⁵Panongu pushoye yenguyeleive pelo; panoqo phikilo khumu puxutsu kevilo.

²⁶Kughengu nono ghimepua kemi shikighime cheni; nono khunoqo ghuza puani keno tipaqo ghime ghili kugha kuho cheni.

²⁷Panoqo xine kumtsu pekithikiyipe qhilo; owu xakulupulo panongu pelo khilemu kusaje pekevilo;

²⁸Kuxumi kaku lono panoqo je nuxa vetsulo; owu timiqo je ake gholo panoqo je sutsu kevilo.

²⁹Ikemu niye shishe supuzu amlo kusa shiani; ikhapeqhelulo, O Alhou, eno ixalulo.

³⁰Ino ale lakhi pesu Alhou sheqheni; Ino shikimthikeu lono paye kiutoi kije keno asheshuni.

³¹Hipauno amshi pesu akumllagho shikeu nguno alau AMPEU lopu shi nani, amshitsu kuchopu pesu heqhi piti mllakeu nguno alau shi nani.

³²Nedaqodape akeqono hipau ithulu kelo alovi nani; Alhou mlla chekemiye hino shikumtolu nani.

³³Alhou no khunoqono aquagha shi ani keno tipaqo tsa initsu cheni, eno pawu timi akughushi akeqo kumsumamoe.

³⁴O kungugha eno ayeghi, Alhou she qhelo, azughi eno tile lhoxu akeqo Alhou sheqhelo.

³⁵Pano Jerusalem xalu nani eno Juda yeghilo taun akeqo putu kithe nani. Pawu timiqono tilehi kughuna nani eno ayeghi pighilu nani;

³⁶Paqemiqo tianulino tipau amheghi shilu nani, eno khuuno Alhou kimiye cheni keno tilehi xulu nani.