Read Sumi Naga LESHELE 71 Bible Online

LESHELE 71 - Sumi Naga bible

LESHELE 71

¹[71] AMPEU, niye sushokulu phu susu olau ighi ani; khilemu ishikukujove kevilo!

²Noye amikucho ke, ixaphelu eno ikuphulo. Itsa initsulo eno ixalulo!

³Noye ino ijehlukepu tuqu lakhi shilo, ixalukepu liwo kumto shilo; kughengu noye ituqu eno iliwoke.

⁴O iLhou, kixikilami launo ixaphe lulo, timi lhoksami eno ayikusami kuka lono ixalulo.

⁵AMPEU, niye iwu lajupu oshou bepe ani; ilhothe lono itehi kutolo opukhu acheni.

⁶Ikuxu kupuju niye oshou mungube acheni; ipunuke tsala lono nono isushope acheni. Niye pulhapuju osheqhenike.

⁷Timi kutomo ghenguno ikuxuno kichekipiyeu shi acheni, kughengu nono isusholukeu liwo ke.

⁸Atsala kupuju niye osheqheni eno okimthe jukuvupu ikichi lono osheqheni.

⁹Itehiye ino kitemi shiveake ipeve kevilo; ino kulhokugho shive ake ghenguno iqhive kevilo.

¹⁰Ighumino ipithive nishi ani; panonguno ighili kugha eno ipithi veniye kuchughu ani.

¹¹Panonguno pi, “Alhou ye pa qhi veake; ningu pa papesu wuno tsuquluveni; timi khunomu pa xaphelumae.”

¹²O Alhou, ilauno putosupe akevilo; O iLhou, mighi ikuphu kepushi ighilo!

¹³Khunono ingku akhani keno nono leluvelo eno shikukujovelo; panongu thaighave eno kujomuzave pelo.

¹⁴Ikemu niye pulhapuju ohuqheni, eno alau alaushi osheqheni.

¹⁵Ikichi lono omikucho kumla lheni, atsala kupuju owu xakulu ghili pini; niye hipaqo ithikhao tomlae.

¹⁶Ino okuka okumto sheqheni, AMPEU Alhou, niye amikucho kumla likhi sheqhenike.

¹⁷O Alhou, ino lhothemi shiaphi lono nono ishikapiyeke, ino okumzapu kumla piani aphie.

¹⁸Tihutoi kitemi eno asa mpave namu pianiaphi, O Alhou, ipheve kevilo! Tiqhelimi kumtsu vilo okuka kumto ghili piakelo igholo chelo.

¹⁹Omikuchoye atsutsu kutolo to ani, Alhou; nono thime kije shivetsuke, khumu otoikemi kuhae.

²⁰Nono shiluksa eno ghichhe ghime ishou pukuke, ikemu nono ikumto suchile sughi nani; nono akumoki launo isachile saghi kithe nani;

²¹Nono puzuu nguno alau ipelo kije shilupe nani; nono itaghi iloku ghunotsu nani.

²²Owu iqemokeu mikucho ghenguno ino akighilebo pesu oshe qhe nani, O AMPEU; Ikighilebo lono lephe pe osheni, O Israilmi wu Akimtheu.

²³Kughou ino osheqheni keno ikichilo alokivishi asheshuni, nono ixalu kehu imlo kuchopu suno pheni.

²⁴Omikucho kukuphu atsala kupujulo ino lhenike, kughengu ighuzaniye pukaputsa akeqo hu nono halevetsu eno kujomzavepeke.