Read Sumi Naga LESHELE 73 Bible Online

LESHELE 73 - Sumi Naga bible

LESHELE 73

¹[73] Alhou ye kuchou no Israilmi lau akivipu shike, amlo kimthe puakemiqo lau akivipu shike.

²Ikemu niye ipukhu puxapesu veqhi veni cheni; inepaye nekiphepe iluqiveni cheni.

³Kughengu ino qhezalaki kemi jupesu anheshuke eno kixikilamino akuxu viaghikeu jumine kehue.

⁴Timi hupaqoye akusu ghi suchemoe; Pano shi-ajiye mutotoi ahi kivike.

⁵Timi kutami toi panonguye shiluksa shijumoe; panonguye kutamino shisa akeu toi shisa jumoe.

⁶Tighenguno panonguye achiku nikeshi aqhekuza pepu acheni, eno heqhibuqhi keuno aphikuzu toi pepu cheni;

⁷Panongu nhethiye atha pubeyike, eno panongu mloye kixikila mquno qoli acheni.

⁸Panonguye alhoksa thime pipuzu kutami junuqhi; Panonguye qheza cheni eno kutami qhasu nikeu muqu phu acheni.

⁹Panonguye Alhou kungughalo akeu pipusa acheni eno panongu milino ayeghi xupide acheni.

¹⁰Ikehu Alhou wu timiqo papughi panoqo lau ideighi puzu panongu no pikeu pai puluve cheni.

¹¹Panonguno pi, “Alhou ye ithini chemoe; shishe Akiqheuye phu pheluni chemoe.”

¹²Kixikilamiye kiutoi kela hi julo. Panonguye kinikuluno kupu kunoshi ani eno ililai ani.

¹³Ino akimthe kuxu xuachekeuye adou shivepeni eno axine shimo no achekeu huye adou shive peni kesha?

¹⁴Alhou, nono ipelo atsala kupuju aghimeshi anipeke, inaqhe atsu-tsu iheqhike.

¹⁵Ino titoikeu tsa pipuaghi aye niye owu timi lakhi toi kuchou shimovae.

¹⁶Ikemu kughono ino hipaqo kupuna kumsujuni keno hiye ighenguno kushokutsupu shive,

¹⁷tiye ino ochinekilo wumphi kutolo tishi ake. Tileno kixikilamiye kiu shive nani kela ino vethaluke.

¹⁸Kuchouno nono panoqo pesu neki pheke-alo qhike, panongu pelo veqhive puzu kutsakugnove!

¹⁹Panonguye zuleleno kutsapinyive, akuighupushi panongu jopesu wuve.

²⁰Panonguye timi lakhino asamo pumo apuzu inaqhe ye hauve ketoi, kughou nono ithughini keno pano qoye hauve aghi nani.

²¹Kughono ikukumsu kukhukimiji shiakeno eno amlo ghuza pusu ani keno,

²²Niye lhoxu lakhi toi izuvulayike; niye omthave cheni.

²³Ikeghi niye pulhapuju okupunu ngo cheni, eno ouno itsuqupe acheni.

²⁴Okukutsu kivi pesu nono kichepi yeke, ashekhaloye agigihupu shi nono ni ikhilu nani.

²⁵No kumoaye kungughalo niye khuu ani kya? Noye igholo ani tighenguno ayeghilo kutau kiu lunishi akepu kya?

²⁶Ikukumsu ngo iphiashiye qeinai kitheluvi, ikemu Alhou ye ikumtoke, pulhapujulo iwuke.

²⁷Khunono opheveni keno kuchouno puhaveniake; khunoqono olau akimki shini keno noye tipaqo kutsapinyive nani.

²⁸Ikemu ighenguye Alhou punukhoi akeu huye shishe akumzapu ke, AMPEU Alhou pesu ino ijehkepu shiluveake, pano mlakeu kumtsu asheshu tsuni cheni.