Read Sumi Naga LESHELE 74 Bible Online

LESHELE 74 - Sumi Naga bible

LESHELE 74

¹[74] O Alhou, noye kushiye niha pupove ani kya? Noye alhokupuju ow timiqo shou amlo ideni kesha?

²Owu timi, khipaqo nono kha-ghino kisheluve akeno tipaqo kumsululo, khunoqo timi quaxe shiakelono owu timi muqo shipeniye saipe ghikeqo kumsululo. Zion toghi, ghuthu lakhiye nono tile achekehu kumsululo.

³Hi hexapinyi pesu puakeqo shou cheujulo; nighumiqono Achine kilo thwokha kumtsu kutsakhave ake.

⁴Oghumino ochinekilo tokulu ghule kue; panongu wu tokulu michiphi pesu tilehi qhike.

⁵Panonguye asu-thaqhi chekemino pano mughu pesu asubo yeqhi cheke toike.

⁶Panonguno asulipalo aye shisu puakeu kumtsu pano mughu eno azuta pesu ghipho pinyivetsuke.

⁷Panonguno ochineki shipusa puzu ami suvetsu; khipa-alo omlla cheni keno shikuchhubeve tsuke.

⁸Panonguye ningu kitilamu ghumono kutsakhaveniye shike, ayeghilo akimthe-a kumtsu panonguno pitikhave tsuke.

⁹Niw akimthe michi shipuakeu kumtsu kuhavae; tungkupmi lakhimu ghumovae, eno khitohi titoi anani keno milakhinomu mthae.

¹⁰O Alhou, nighumiye ado khitohi ojunu apeni kya? Panonguye alhokuthu oje piputha peni kesha?

¹¹Noye kushiye nikuphu move akya? Kushiye o-u othiu kumsho pesu auvea kya?

¹²O Alhou, ikemu abothu lono noye ningu kukauke; nono ghuthu kutomo nixaluvae.

¹³Okuka kumto pesu nono azughi kijethake eno azu ghahwu boghe hephotsuke.

¹⁴Nono aghahwu Leviathan boghe ghaphotsuke, eno asayelo tugha shi pelo pa kumo chupeke.

¹⁵Nono azupuki eno azu qolekeuki shitsuke; nono aghoki kije puthove tsuke.

¹⁶Nono putho pucho tsala lhoke; nono aqhi tsukinhe pelo pano alo apeke;

¹⁷Nono ayeghi shekichi kutotsuke; nono mutsutsala eno susutsala lhotsuke.

¹⁸Ikemu, O AMPEU, kumsujulo, oghumino ojunuke; Panonguye Alhou kumthami eno omithike.

¹⁹Owu timi kiumu shimlano akeqo pano ghumi ayikusami ulo phesuve kevilo! Owu timi aghime tsuakeu noye kumsuma kevilo!

²⁰Nono ningu sasu puloshoqhi shikeu kumsululo. Ayeghi cheku akuzu akeu kumtsulo heqhi buqhi keu anike.

²¹Nedaqoda pesu akeqo shikukujo vepe kevilo; kumlhomi eno aquaghami pelo osheqhe pelo.

²²Ithughilo, O Alhou eno ovehupu susholulo! Alhou mthakemino atsala kupuju ojunu akeu kumsululo.

²³Oghumino axu kighideshi ighakeu hu phekevilo.