Read Sumi Naga LESHELE 77 Bible Online

LESHELE 77 - Sumi Naga bible

LESHELE 77

¹[77] Ino Alhou lau ighono ighamukue. Ino ighamuku kelo pano itsa chilutsu ke.

²Shiluksa ghulokilo ino AMPEU lau inikhuke; puthotsu iu peqhepe pa lau akighini shike, ikemu niye alokughuno phumlake.

³Kughou ino Alhou kumsuni keno niye imlo mukuke; ino kumsukuto ju kelo aghuthi suveke.

⁴Pano ipelo puthotsu zuhupemoke; niye amlo ghime launo atsa piphemlake.

⁵Niye wovekeu tsalaqo kumsuju eno kha-ghi ghuloki kumsulu cheni.

⁶Niye thonhei kumsujukeu lono putho tsala puwo cheni; Ino kumsu piliju eno ilikhi ivilo hi iniju cheni.

⁷“AMPEU ye pulhapuju ningu pevenia kesha? Paye khilemu ningu lau amlo qimoa kesha?

⁸Paye ningu kimiyemovea kesha? Pano piqhipuakeu hu tishimovea kesha?

⁹Alhou ye kupu kimiyenikeu kumsumave akesha? Pano qhuivulayikeu zuqhulo aloghu kighide auve akesha?”

¹⁰Tileno ino hi pi, “Shishe ighuza akeuye hike — Alhou ye akuka akeu kumovae!”

¹¹Niye okumla kije kumsulunike, O AMPEU, Wovekeu tsalalo nono akumzapu kumla shikeu ino pikithenike.

¹²Nono mlatsukeu kumtsu niye kumsukuto junike; okughushu kumlaqo ino kumsukithe anike.

¹³O Alhou, nono mlakeu thwokha kumtsu akimtheke, khuno lhou mu otoi kije kuhake.

¹⁴Noye akichiqhi kumzapu shichekeu Lhou ke; nono ashiayeh gholo okumto pephepiyeke.

¹⁵Okuka peithano owu timiqo xaluke, ti Jakob lagha eno Jese laghaqo.

¹⁶O Alhou, kughono azuno noithu lunikeno panoqoye musaveke, azughi kuthono musa khokho shiveke.

¹⁷Khungkusuno tsutsughu ghuqhike; tsutsu kusuno atsutsu lono vepho iqighi; tsutsuphano aqha kumtsulo kuloke.

¹⁸Owu tsutsukusu vepho iqighikeu hu kulusawuve, eno tsutsupha kukulono ayeghiqha yepuvuke; ayeghino khokhoshi ithake.

¹⁹Azukukucho shou nono alacheke; nono azughi kutho kathawuke, ikemu opukhu nepaye ithumlake.

²⁰Nono bherikheu toi owu timiqo sasu wuke, Muse ngo Aron pama pelo ampimi shipeke.