Read Sumi Naga LESHELE 78 Bible Online

LESHELE 78 - Sumi Naga bible

LESHELE 78

¹[78] O iwu timiqo, iyezah inilo, ino pikeu tsa amlo tsuqhiyi ini tsulo.

²Kimighi piyekeu lono ikichi xukhono pini cheni; wovekeulo tuqho-tughou tsa lhepiyenike,

³Ninguno chilu eno ithivekeu ghili, nipuasuno nivilo pivekeu ghiliqoke.

⁴Ninguye tipaqo nitianuli launo kusumo nike; AMPEU kuka eno akumzapu kumla kije pano mlakeu ninguno ighinikeu tiqhelimi vilo pinike.

⁵Pano Israilmi lau ayezahqo tsuke, eno Jakob lagha launo ahzakutsu shike. Pano nipuasu vilo piputokeuno pano tianuli vilo pa yezahqo shikapiyelo pike,

⁶tishianguno ighinikeu tiqhelimi pelo tipau ithipeni, eno panoqono itaghi pano tianuli vilo pikibe peniyeke.

⁷Hipa ghola lono shianguno athiu tiqhelimi pelo Alhou pukhu, eno pano kiu mlavea keno kumsu mavemo puzu alhokuthu pano ahza tsukeu pelupe niyeke.

⁸Panongu pelo nipuasuqo toi hekibide, eno agholumokemi shipe moniyeke, nipuasuno Alhou pukhukeuye mutotoi moke, eno pa lau iqemokeu mikucho shimoke.

⁹Efraimiye aghukishi tsalalo asuzu eno apiji pepuzu kohapoveke.

¹⁰Panonguye Alhou sasu puloshoqhi shikeu pelumoke, panonguye pa yezah papenikeulo miliveke.

¹¹Panonguye pano kiu mlaithakeno kumsumave, pano akumzapu kumla shikeu panonguye ithulu puake.

¹²Panongu puasuno jukuto akelo, Alhou no akumzapu kumla shike, tiye Zoan qa eno Ijip yeghi lono ke.

¹³Pano azughi kijethaveno panongu sasu ti hechewuke; pano azu pelo atozu toi puthughovepeke.

¹⁴Puchouye khungkusu pesu pano panoqo sasuwu, eno putholo ami kuvuno panoqo sawuke.

¹⁵Asayeqhalo pano atuqu ghaphono lhaphe puzu azughizu toi kupukuno shi panongu piye.

¹⁶Pano atuqu lono aghoki qoipe ghipe eno azuno aghokilo toi qhowuke.

¹⁷Ikemu panonguye tamo mitheno Alhou shou axine shike, eno asayeqhalo Shishe Akiqheu shou hebideke.

¹⁸Panonguno puthaputsano Alhou ghujuke, tiye panonguno chunishikeu chuqupu khukeu lonoke.

¹⁹Panonguno Alhou vilo akumou tsa ishipi, “Asayeqhalo Alhou ye achuqupu puwu tsuluni kesha?

²⁰Mutsuqheyino pano atuqu ghapho puzu azuno phaphashi qoipeghike; ikemu paye pawu timiqo asho eno ashi ghi pesu tsulu nani kesha?”

²¹Ike kughono tipaqo chilu keno AMPEU ye axu-ideve; eno pano ami pesu pawu timiqo pitiqhi, eno panongu shou pa xukighide alau shive,

²²Kughengu panonguye pa shou akupulu kuhake eno panoqo xaluve nani kepi panonguye pulumoke.

²³Ikemu Alhou no kunguu atsutsu vilo pi eno tipau hukikha khaqhilopi ahza tsuke;

²⁴Kungugha lono pano athi pesu panoqo tsuke, ti panongu pelo chupeniye manasho piqi tsuke.

²⁵Ikehu panonguye kungumi chuqu chuke, eno panonguno lunishi keu toi Alhou no tsuke.

²⁶Pano kipelau mulhu pelo mulhupe, pa kukano apeu mulhu ghi hakilhe puthuke;

²⁷Azughi mukulo asaye akeu jejehi aghauqo pelo paw timiqo lau ye iqighipeke.

²⁸Aghau qono panonguno ngo akeu phiki mutalo iqighike.

²⁹Ike timiqoye chupuzu aghaqilue, panonguno lunishikeu Alhou no tsuke.

³⁰Ikemu panongu kimiheye ghasu mlano auve eno itaghi chuauve,

³¹Ike Alhou ye panongu lau axuideve, Israilmi gholo akumtomi eno akivimi pithivetsu.

³²Hitoive kethiughi timiqoye axine shi acheuve; akumzapu kumla ithuluve kethiu ghi panonguye Alhou pukhumoe.

³³Ike panongu tsalaye atuthu toi kishekhave eno panongu kuxuye zuleno hephokicheyive tsuke.

³⁴Alhou no panoqo gholo khami pithi vetsu kelo kutamiye pa lau xaideghike; Panonguno xachile ighino pa vilo amlo tsuqhiyi inikhuke.

³⁵Panonguno kumsulukeulo Alhou ye panongu susholu eno Akughushuuno panoqo kuphu cheke.

³⁶Ikemu pano tsapiye akimki likhi; panonguno pikeu lakhimu kuchou shimoe.

³⁷Panonguye pa qhoqhumoe; panonguye pa sasu puloshoqhi shikeu pukhukile mlaveke.

³⁸Ikemu Alhou ye pawu timiqo kimiye kutuke. Pano panongu xine pevetsu eno panongu kutsa pinyivemoke. Ghuthu kutomo pa xukighide eno aloghu suchile pesu ngoveke.

³⁹Pano kumsulukeuno panonguye thivenikuau timiqoke, amlhu mulhu ighieno chevekeu paphike.

⁴⁰Panonguye timi kughunamoke-alo ghuthu kutomo Alhou hebideke; ghuthu kutomo panonguno pa mlo shipsa tsuke!

⁴¹Anguno anguno panonguno Alhou ghukejuke, eno Israil Lhou mlo ghimepu sughike.

⁴²Panonguye pa kuka kije akeu kumsumave eno panongu ghumi launo pano panongu xalukeu tsala kumsumave,

⁴³Zoan qhalo eno Ijip yeghilo akumzapu eno akughushu kumla shikeu kumsumave.

⁴⁴Pano aghokilo azu pelo ahji shivepe eno Ijipmiye yekepu zu kuhave.

⁴⁵Pano amiyi kutomo panoqo lau puwu eno panongu tsaqhipe; eno achuyi puwu puzu panongu punaqhipe.

⁴⁶Pano tulhaqu puwuno pano xabo chuvepe eno aluza shipsave tsupe.

⁴⁷Pano murasu pesu panoqo tsaibo vethaqhipe, eno avutsano khughuthibo kughaqhipe.

⁴⁸Pano murasu pesu panoqo wu atsu aqu pithivetsu eno tsutsu phano bheri loji pithivetsuke.

⁴⁹Pano pa loghu eno pa xukighide puwu puzu panongu pelo alo mihimuza kepu kije shivepe, eno akithi ghinimi sutsa ighipeke.

⁵⁰Paye pa xukighide suchileluve moe momu panoqo kuxu ghutsumoe, eno pusa lakhi pesu panoqo pithike.

⁵¹Pano Ijipmi kibolo anu noghiu thaqhu pithivetsuke.

⁵²Tithiuye pano bherikheu lakhi toi pawu timiqo saphe sawuke, eno asayeqhalo panoqo laghi kiche piye cheke.

⁵³Pano kikhikighi shi panoqo sasuwu eno panonguye musamoke; ikemu azughino pano ghumi shou kulusu ikughike.

⁵⁴Pano pa kimthe yeghilo panoqo saghi, pa ampino tolupe puakeu naghutolo.

⁵⁵Pawu timino azuu hakemtsa tipa yeghilo aghikemi pano haphevetsuke; Pano Israilmi lagha dolo timiqo yeghi pano kijetha pesu tsuke; eno timiqo ki-alu pesu pawu timiqo tsuke.

⁵⁶Ikemu pawu timiqono Akughushu Lhou hebideke eno pa ghukejuke. Panonguye pano ahza tsukeu hu pelumoe;

⁵⁷Ikemu panonguye pano puasu toi hekibidemi eno aghekulu kumomi shike, eno apiji kughuho toi pukhubemlae.

⁵⁸Panonguno Alhou mthakeu kumlla ghola lono pa xukighide tsu, eno panonguno ajulho shisukeu huno pa loghu kighidevetsu.

⁵⁹Alhou no tipau ithulukelo axuideve, ikehu pano pawu timiqo qhoi peveke.

⁶⁰Pano Shilo lo achekeu akumlla phiki phevetsu, tile ngo puzu ningu sasu achekeu alo.

⁶¹Pano Puloshoqhi Bohu pa kimthe jukuvu eno pa kuka hu, nighumi ulo phesuvetsu.

⁶²Paye pawu timiqo lau pa xuideve eno panoqo ghumi pelo ghiqhi pithipe.

⁶³Aghukishilo nipumiqo ghiqhi pithi vepe, ilimiqoye khumu sasu kula kupu shikepu kuhave.

⁶⁴Achinetomi ghi ghiqhi pithivetsu eno pano nipu chimemi shivekeqo pelo mloqa pemoe.

⁶⁵Ashekhalo, AMPEU no zu apuzu ithughi keshi ilhethughi; Paye timi kumtomi lakhi aji shopuxu pe akeshive.

⁶⁶Pano pa ghumi hachilevetsu; alhokupujulo kujo chekepushi qhive.

⁶⁷Ikemu paye Josef laghami peveke, Efraim laghami pano kishelumoe.

⁶⁸Tipaqo zuqhulo paye Juda lagha kishelu pano kimiyeqhiyi chekeu Zion toghi kishelu.

⁶⁹Tilehino kungughalo paki akeu toi pa chineki shike; ayeghi hutoi pano tipau shikumtope qhike eno pulhapujulo mutotoi shikumto pe qhike.

⁷⁰Pano pa qeu David kishelu; Pano khilehi atsuaqu jukutokhe achekeno,

⁷¹Atsuaqu pighichekeu-a lono pa ikhiluke, eno pano David pesu Israilmi kukau shivepe, Alhou wu timiqo kheu shipeke.

⁷²David no pa likhi pa sala phumono timiqo tuchohejuke eno shitsashi panoqo sapheke.