Read Sumi Naga LESHELE 79 Bible Online

LESHELE 79 - Sumi Naga bible

LESHELE 79

¹[79] O Alhou, ophimokemino oyeghi leighivae, Panonguno okimthe chineki shipixivetsu eno Jerusalem ye hepho pinyivetsuae.

²Panonguno owu timi kithikumo pesu aluqu tsuvetsuke, eno tughashi pelo chupeniye oqemi kithikumo qhitsuke.

³Panonguno azu pelekeshi owu timiqo ji peleke, Jerusalem kupujulo ahjino azutoi qowuke eno akithi kumo qhonikemi khumu kuhaveke.

⁴Ashiayeh nisumxape akemiqono ni piputhake, panonguno ni junu eno ni thaighake.

⁵AMPEU, noye alhokupujulo nilau oxuide anani kesha? Oxukighideye tamo mitheno ami toi iqu ani kesha?

⁶Omllamokeu shiayehqo shou oxukighide puku tsulo, ovilo khuinimo kemi shou lepuku tsulo.

⁷Kughengu panonguno owu timi pithikhavetsuke; eno oyeghi shipusakhave tsuke.

⁸Ni puasuqo ghenguno ni ghimeqhi kevilo. Ni shou kupukimiye tsulo, Kughengu nino lajuchekeqo kumtsu havae.

⁹Ni kuphulo, O Alhou eno ni xalulo, ni sunhephelu eno oje kivipu ghenguno ni xine peivetsulo.

¹⁰Kushiye ashiayeh kutami pelo nivilo “Nongu Lhou khile ani kya?” ipi anipe kya? Ashiayeh kutamino oqemiqo ji pele keu ghenguno nono panoqo ghime qhikeu ni pelo jupelo.

¹¹Akughumino imekeu ghugha iniju tsulo, pithive nikeu shi kughathave kemiqo okuka kije pesu panoqo khaqhiphevelo.

¹²Ashiayeh kutamino oshou opiputha keu tsa pikeu ghenguno aghime ghuthu tsuni kutolo tsulo, O AMPEU!

¹³Tishiaye, ningu owu timi, owu bheri qono alhokupuju oshikimthini, ighinikeu ghulokilo ghi osheqhenike.