Read Sumi Naga LESHELE 81 Bible Online

LESHELE 81 - Sumi Naga bible

LESHELE 81

¹[81] Alhou, ni kumtou lau ighamuku alephelo; Jakob Lhou vilo sheqhekeu lephelo!

²Alebo ghugha huthulo eno tur-tur lebo helo; akighilebo jeli lono inikivile phelo.

³Tiqhetini tsala ghenguno afuko ighalo, kughono aqhi kithe eno aqhi kichhi shini keno ighalo.

⁴Hiye Israil lo ayezah lakhike. Jakob Lhou no ahza tsukeu lakhike.

⁵Kughou pano Ijipmi yeghi leighi keno tileno hipau yezah Israilmi lau tsuke. Chimlano chekeu sutsa lakhino ishi pikeu ino chilu,

⁶“Ino nongu mqa lono amakho ikhi vetsuke; ino nongu pelo atuqu pepu chekeu qhilupeke.

⁷Nonguno shilusa akelo ighamuku ikuke eno ino nongu xaluke. Pasapaghalo ino itshu akeu-a lono ino nongu khochileke. Meriba zupukilo ino nongu ghukejuke.

⁸Iwu timiqo ino nongu kutughuakeu inilo; Israil, niye nongu pelo itsa initsu penishi anike!

⁹Nonguye khilemu alhou kutau mlla kevilo.

¹⁰Niye nongu Lhou AMPEU ke, Ijip yeghi lono nongu sasu ipeghikeu huke. Nongu kichi xukholo, ino nongu lojinike.

¹¹Ikemu iwu timiqono itsa initsumoe; Israil no ighelumoke.

¹²Ikehu ino panoqo pelo aghelumo kemi laghilo wuvepeke, eno panonguno kiu shinishi keno shipeke.

¹³Iwu timiqo pelo itsa initsu penishike; panonguye ighokulumi shipenishi ke!

¹⁴Ino paikhavino pano ghumi leluve tsuni eno panonguno sasu kumjo akemi tove tsunike.

¹⁵Khunono imithi chenikeno musake launo izulo itsaiqi nani; panoye alhokuthu aghimeshi nani.

¹⁶Ikemu ino athi akiviu pesu nongu lojinike, eno aghalo khingozu pesu nongu ghapiqi tsunike.”