Read Sumi Naga LESHELE 86 Bible Online

LESHELE 86 - Sumi Naga bible

LESHELE 86

¹[86] AMPEU, ino pikeu inijutsulo eno ikhochilelo, kughengu niye akukuphu kuha eno miqemileyikemi.

²Ino oqhoqhu chenike ghenguno akithi launo ixaphelulo; ixalulo kughengu niye oqemike eno niye opukhu acheni.

³Noye iLhou kehu ikimiyelo; niye atsala kupuju ovilo khuini ani.

⁴Oqeu lopivi tsulo, O AMPEU kughengu ikighiniye iku oto anike.

⁵Noye nilau akivipu eno ikhilukeu shiacheni, ovilo inikhukemi kumtsu lau iqemokeu kikimiyeno chhitoi anike.

⁶Ikighini initsulo, O AMPEU, kuphupeniye ighamuku keu chilu tsulo!

⁷Ino shilusa ake ghulokilo okuani, kughengu nono ikighini khochile cheni.

⁸O AMPEU, khumu otoikeu lhou kutau kuhae, nono kiu mlakeno khunomu ti shilu puamoe.

⁹Ashiayeh nono lhopuakeqo kumtsuno ozulo ighipuzu itsaiqi omlla nani; panonguno noye kije kepi sheqhe nani.

¹⁰Noye akughushuuke eno akumzapu kumla shicheni; olikhino Alhou ke.

¹¹Noye ipelo kiu shipenishi anikeno ishikalo, O AMPEU, eno ino amlo iqemono ogholunike; imlo kuchopu tsupuzu oqelu kepushi ishikalo,

¹²Imlo kuchopu pesu ino osheqheni, O AMPEU iLhou; Noye kijekepi ino pulhapuju asheshuni.

¹³Owu iqemokeu kikimiye ishou shishe kije anike! nono akumoki launo ixapheluveke.

¹⁴Aqhekuzamino ishou ikughi ani, O Alhou; timi yikusa lojino ipithiveniye pukaputsa ani-timi hipaqoye ojukutomokeqo ke.

¹⁵Ikemu O AMPEU, noye kupukini eno kimiyekini Lhou ke; alhokupujulo kutuukulu, kimiyekeu eno pukhukulupu.

¹⁶Ilau tsughu ighilo eno ikimiye tsulo; ishikumto tsulo eno ixalulo, kughengu izano shicheketoi niye oqe achenike.

¹⁷O AMPEU, noye akivike pikeu michi ipiyelo; nono alokughuno eno akukuphu itsukeu hu imithi chekemino kughono ithuluni keno panoqoye kujove nani.