Read Sumi Naga LESHELE 88 Bible Online

LESHELE 88 - Sumi Naga bible

LESHELE 88

¹[88] O AMPEU, iLhou, ino puchouno ikuphupeniye igha okuke; putholo ino ozulo ighamukuke.

²Ikighini pelo ozulo ighilu pelo, ino igha okukeulo initsulo!

³Shiluksa kutomo ishou ikughi ani kehu niye thinikeu kupunuveni cheni.

⁴Niye timi thiveniaye akeqo gholo kihisuvekemi toive, ikumto kumtsu chevae.

⁵Niye kithimi gholo phesuvae, Niye akumolo ghiqhisuveno thia kemi toivae, tipaqoye nono qhoi kumsumavekeqo ake, Panonguye nono kuphumlano akeqoke.

⁶Nono akumoki akuthoulo ikughape vesuveke, aqoh kuthou eno zuchiyikeulo ivesuke.

⁷Oxukighide ishou mishishei qape ani, eno niye tipau kimshi qholo tsaphopiniyi pe ani.

⁸Nono iwu shompami pelo iphevepe; nono panongu pelo ikughape kuchhubekepu shivepeke, ikhasu luvae eno niye pomlae;

⁹aghime launo inhethiye zamemeivae. AMPEU, ghulo atsutsu ino oku acheni, eno i-u peqhepe ovilo akighini shi acheni.

¹⁰Noye kithimi ghenguno akumzapu kumlashi tsucheni kesha? Panonguye xuithughino osheqhe chenima?

¹¹Akumokilo owu iqemokeu kikimiye pikile chenima? Momu kutsa pinyikeu-alo noye pukhukulu kepi pi chenima?

¹²Ti zumoikeu-alo nono akumzapu kumla shikeu ithulu chenima? Momu kumsuma qhoive ke yeghilo noye akivi kepi ithulu chenima?

¹³AMPEU, kuphupeniye niye okuke; ina-atsutsu niye ovilo inikhu cheni.

¹⁴Noye kushiye ipeve anikya? AMPEU! Noye kushiye ilauno tsughuve ani kya?

¹⁵Ilhothe lono niye aghime shiveno thiveni keshive; niye nono aghime tsukeu makho xapu lhovae.

¹⁶Oxukighideno ighaphopiniyive akuighu huno ikutsaqhike.

¹⁷Tipaqono atsala kupuju zuqo lakhi toi isuhope ani; aqha kumtsu lono ipunukhoipe ani

¹⁸Ishou kuchou ghi iqhivepeke, eno zumoikeu likhino ikusau shiani.