Read Sumi Naga LESHELE 89 Bible Online

LESHELE 89 - Sumi Naga bible

LESHELE 89

¹[89] O AMPEU, niye pulhapuju owu iqemokeu kikimiye ghili phenike; noye amikucho kepi ino alhokuthu asheshuni.

²Ino ithianike okikimiye ado kumtsulo ache nani, eno omikuchoye atsutsu toi athoshi anike.

³Nono pivae, “Niye timi ino kishelu keu sasu puloshoqhi lakhi shivae; Ino iqeu David vilo tushoqhikeuno,

⁴‘Olaghami lakhino pulhapujulo akukau shi nani; Niye okuka mheghi alhokupuju qhipuatsu nani.’ ”

⁵Nono akumzapu shikeu kungughano phe ani; panoqono omikucho ghili phe cheni, O AMPEU.

⁶Kungughalo otoikemi lakhimu kuhae, O AMPEU; kungughami khumu oqhemi kuhae.

⁷Akimthemi Hoholo ogihuqhiyi acheni; eno kumtsuno puthughono akichiqhi noikhilu acheni.

⁸AMPEU Alhou Akughushuu, khumu otoi akughushu kuhae; thwokha thimelo noye amikuchoke O AMPEU.

⁹Nono azughi kuka shou ayehpeke, tipau zu tukucho kighide nono ghasuke.

¹⁰Nono aghahwu Rahab munudaqhi eno ti pithiveke; okuka kughushu pesu oghumi theqhiveke.

¹¹Kungugha eno ayeghi ghi owuke; nono ayeghi eno tile thwokha akeu lhoke.

¹²Nono ahuu eno apeu lhoke; Tabor Toghi eno Hermon Toghi no alokivi launo oshipilike.

¹³Noye kiutoi akuka akeu kela! Okumtoye kiutoi kije kela!

¹⁴Okukaqhaye amikucho eno achipiu shou shipe be ani; Nono shikeu kumtsulo kikimiye eno pukhukulu piyeke.

¹⁵Ale phe pesu oshe omlla chekemi timiqoye kiutoi alokivipu kela! Panonguye ogi kuvulo xuache nike!

¹⁶Oghenguno panonguye atsala kupuju alovi acheni, noye aloke ghenguno panonguno osheqhe cheni.

¹⁷Nono tokulu kije pesu ningu tsuke; okikimiye lono nono ningu pelo tokulu lephepeke.

¹⁸O AMPEU, Israil Lhou Akimtheu nono sushokulu akukau ni tsuke.

¹⁹Khaghino kungu nhetsu lono nono oqemi amikuchomi vilo piveake, “Niye ghushimi ajekipiu lakhi kuphuvae. Timi gholono ino kishelukeu lau akuka lakhu tsuvae.

²⁰Iqeu David ye akimthe teli pesu nukishe puzu akukau shipeke.

²¹Ikumtoye pulhapuju pa gholo ache nani, ikukano pa shikumto nani.

²²Pa ghumiye khilemu pa shou tolu vepemo nani; kixikilamiye pa leluvepemo nani.

²³Ino pa ghumi chunudaqhi nani, eno pa mithi chekemi kumtsu pithive nani.

²⁴Niye pa kimiye nani eno pa qhoqhu ache nani; niye pa pelo alhokuthu tolu chepe nani.

²⁵Ino pa kukaqha pekhotsu nani, Mediteriya Zughi lono Eufrati ghoki kutolo.

²⁶Pano ivilo ishi pinani, ‘Noye ipu eno iLhou ke; noye isushokuluu eno ixakuluu ke.’

²⁷Niye pa pelo inu anoghiu shino kukami gholo akijeu shitsuni.

²⁸Niye pa vilo piqhivekeu alhokuthu peche nani, eno ino pa sasu puloshoqhi shikeuye alhokupuju ache nani.

²⁹Pa kuka mheghiye atsutsu toi athoshi ache nani; pa laghami lakhino pulhapuju akukau shi nani.

³⁰‘Ikemu pa laghamino iyezah hebide aye, eno ino ahza tsukeu kiqi lono xumoaye,

³¹Panonguno ino kutsukeu tsa phimoaye eno iwu ahzaqo pelumo aye,

³²Tileno panongu xine ghenguno ino panoqo ghimeqhini. panonguno pimivekeu ghenguno aghime sholupe nani.

³³Ikemu niye David kimiyemovekeu shimo nani momu ino pa lau ashoqhi shivekeu phevemo nani.

³⁴Niye pa sasu iwu puloshoqhi shikeu hephomo nani momu ikichi lono piqhivekeu tsa kilivemo nani.

³⁵“Ghuthu khavino alhokuthu ghenguno ilikhi ikimthe je pesu ino piqhivae: niye David lau khilemu mikimoke.

³⁶Paye alhokuthulo pa laghami anani eno tsukinhe kuvu ake kutolo ino pa kukaqha khetsu anani.

³⁷Tiye aqhi toi, atsutsulo iqemo keu shepeu toi ithamokepu shi anani.”

³⁸Ikemu noye nono kisheluvekeu aku kau lau axuideke; nono pa pheve eno pa peveke.

³⁹Noye oqeu sasu puloshoqhi shikeu kuboleve; eno pa kuka kutsukuqhoye anibalo vesuvetsuke.

⁴⁰Nono pa phughi putukhakeu khagho hexapinyivetsue eno pa liwoye ixapinyi qhiveke.

⁴¹tipa veche wuchekemi kumtsu paw tinhemgha pukaluvetsu; pa kisughumi kumtsuno pa junuke.

⁴²Nono tokulupu pesu pa ghumi tsuke, nono panongu pelo alokivishi peke.

⁴³Nono akukau ghunanu pelo kiumu shimlavepe eno aghushilo paye timino leluvepeke.

⁴⁴Pa kuka kusu nono ikhiluvetsu eno ayeghilo pa kuka lakhu kuluqhivetsuke.

⁴⁵Pa do tomphi lono pa pelo kitemi shivepe eno kujomza keuno pa nhaluvepe.

⁴⁶AMPEU, noye alhokupuju itshu auveni kesha? khitotohi ologhuye ami toi iqu anani kya?

⁴⁷Ikuxuye kiutoi ikhonhei keno kumsujutsulo; nono ningu kumtsu thivenikeu shi lhoqhike!

⁴⁸Khuuno thimono xuakulupu kya? Tiye akumokilo kishieno ilomo kepu shilu nani kya?

⁴⁹AMPEU, noye puzuu kimiyecheke ipikeu michipu khile ani kya? David lau nono tushoqhi puakeu khile ani kya?

⁵⁰Ni oqeu kishi piputha acheni keno kumsuma kevilo, Ayekumthamino ni ghushokeu khitotohi kutuu ani kya?

⁵¹Oghumino nono kisheluvekeu akukau piputhake, O AMPEU! Pano khile khile wunikeno tikumtsulo pa thaighake.

⁵²Alhokupujulo AMPEU sheqhelo! Amen! Amen!