Read Sumi Naga LESHELE 90 Bible Online

LESHELE 90 - Sumi Naga bible

LESHELE 90

¹[90] O AMPEU, noye pulhapujulo nino ngo chekeu ake.

²Nono naghuto lhomphi lono momu ayeghi hipau kughupe qhimphi lono lhokta lono khokta kutolo noye Alhou ke.

³Nono timi pelo paye kiu keno tipaulo idewove chenipe, nono pa sachile sawo ayeghi mukhu shive cheni.

⁴Ampe 1,000 ye oghenguno tsala lakhi toike; tipaqoye ighina tsala toi wove cheni, momu putholo asuchedo lakhi toike.

⁵Nono zuqozu lakhi toi nixapuwuve cheni; asamo pumokeu do nguno akushuu kumoe. Ninguye inaqhe alupi ishe ipeghi keu toike,

⁶tiye thuwu puzu mpakhope pucheni tishi puzu ighuyiveno avelauye thive chenike.

⁷Ninguye ologhu kighideno kutsa pinyive cheni; oxukighideno ni shikichiqhive cheni.

⁸Nono ni xine pesu ozulo qhipua cheni, niwu tuqho tughou xine hu nono ithukulupualo qhicheni.

⁹Nikuxuye ologhu kighideno ghitha kughukhove cheni; atuthu kishedo toi ni mipeqoye kishekhave cheni.

¹⁰Ni mipeye lhotsunike eno ninguno mutotoi aghinamu lhotacheke; ikeghi tipadolo shiluksa eno amloghime likhi ke; akuxuye payi woveno ninguye cheve cheni.

¹¹Timi khuno ologhu kighide kumtsu puju akya? khuno oxukighideno akumsa sughikeu ithi ani kya?

¹²Ni kuxuye kiutoi ikhonhei keno nishikapiyelo, tishianguno ninguno alokutsu shilu kepushi.

¹³Ologhu kighide khitotohi acheuve nani kya? O AMPEU, oqemiqo lau kupukeu alo!

¹⁴Ina-atsu-tsu owu iqemokeu kikimiyeno shepichhi tsulo, tishianguno nikuxu kupuju alovi alephenike.

¹⁵Shiluksa mipe hijejehi nono amlo kusa pesu ningu tsuke toi itehiye tipa qhemi alokivi pesu nitsulo.

¹⁶Ningu, oqemi pelo nono akughushu kumla shikeu ithulupelo; nitianuli pelo owu akughushu jekipi ithulupelo.

¹⁷AMPEU niLhou, okukumgha nigholo apelo; nino mlaithakeu kumtsulo tokulupu nitsulo!