Read Sumi Naga LESHELE 94 Bible Online

LESHELE 94 - Sumi Naga bible

LESHELE 94

¹O AMPEU, noye aghime tsu chekeu Lhou lakhie;

²Noye timi kumtsu shou kughakuthau; ithulo eno aqhekuzami panono ithulukepu qhemi pesu tsulo!

³Ado khitotohi kixikilamino alovi anani kya? khitotohi kya? O AMPEU!

⁴Khitotohi ghikiqhimino qheza anani kya? eno pano lhoksalo qhezalaki anani kya?

⁵Panonguno owu timi junuqhike, O AMPEU! Panonguno timi khuno okudaumi shinikeno tipaqo qhasuke.

⁶Panonguno chimemi ngo mighimgha qo pithike, eno inami ni yeghilo akeqo ghiqhike.

⁷Panonguno pi, “AMPEU ye ni ithuluamoe; Israilmi Lhou ye ithini chemoe.”

⁸Iwu timiqo nonguye kishi puzu hikithipushi aghuzu anikha shini kya? Nonguye kughono shikalu nani kya?

⁹Alhou no nikini shi sutsuke, paye chimlani kesha? pano ninhethi mlatsuke, paye ithumlani kesha?

¹⁰Paye ashiayehqo peitha akeuke, paye panoqo ghimemoni kesha? Paye timi kumtsu shikukauke, paye akighithi kuhani kesha?

¹¹Panonguno kiu kumsuju anikeno AMPEU no ithi ani; panonguno kiqiju akeuye avehu kuha kepi pano ithi ani.

¹²AMPEU, nono kutsupiyekeu timi huye alokivishi kepu anike, oyezah pesu khuno shikani keno tipano lokivipuke!

¹³Kixikilami melunike aqoh lakhi chhumoke kutolo nono shiluksa tsala lono pa pelo akulho qhilu chenipeke.

¹⁴AMPEU ye pawu timiqo qhivemo nani; paye pa laumi qhiveno wuvemo nani.

¹⁵Amikucho xakutha hu kughakutha alo itaghi phulupe nani, amikuchomi kumtsuno tipau choqhe kuphu nani.

¹⁶Khuno ighenguno kixikilami shou puthugho kya? alhoksami shou khuno ikudau sutsu kya?

¹⁷AMPEU no ikuphumo ke aye, niye inaqhoive keu yeghilo mtazu wuve aghini cheke.

¹⁸Ino pi, “Niye veqhiwo cheni,” ikemu owu iqemokeu kikimiyeno ichoqheluke, O AMPEU.

¹⁹Kughono niye amlo susushini eno amloksa shini keno nono ilokughunotsu eno ilopivitsuke.

²⁰Noye alhoksa kughakuthami sasu kidilukeu kuhae, panonguno amikuchokumomi pesu achipiu shike,

²¹Panonguno timi kivimi shou alhoksa kuchughuke eno kuqumokemi pithini keushi xatha cheni.

²²Ikemu AMPEU no ishokhape ani; iLhou no iputupe ani.

²³Pano panoqo wu kixikila ghenguno aghime tsu nani eno panoqo xine ghenguno kutsave nani; AMPEU niLhou no panoqo kutsave nani.