Read Sumi Naga AHOLE 1 Bible Online

AHOLE 1 - Sumi Naga bible

AHOLE 1

¹David nu eno Israilmi kukau Solomon holetsa.

²Hilehi aholetsa anike tino okuphu puzu opelo alokutsu ngo akukutsu kivi michilupe niyeke eno kuthokuzu tsa kiqi vethalu peniyeke.

³Tipaqono opelo kishi tsukhuyi xulu, amikucho eno aghibiu shiluni keno shikapiye nani.

⁴Tipaqono puju shijumphi kemi pelo shitsa shilupe eno lhothemi pelo akighithi ngo peithathi keu shilupe nani.

⁵Aholetsa hipaqoye alokutsumi kighithilo kuphatsulu cheni eno kighithimi kichepiye tsulu cheni.

⁶Tishianguno panonguye aholetsalo akiqi kusupe puakeu ngo alokutsumi no akupuna tsa inijukeu vethalu cheni.

⁷AMPEU sukumsano akighithi hukuthuke. Mbomzumino alokutsu ngo akukutsu phimo gihumo cheni.

⁸Inu, opu ngo oza pamano kiu ovilo pini keno tipaulo amlo tsuqhiyi shilo.

⁹Akutsu kuqho phi momu achila lakhino ojupivipe ketoi panoqo kukutsuno owu ghushoghili jukivi shilupe nani.

¹⁰Inu, kughou axinemino omusuni keno tipau qohlo ilo kevilo.

¹¹Panonguno ovilo, “Nigholo ighilo, ningu khuala heqhi pithinike phuwunie! Kiumu mthano akemi miqeno heqhimughani nolo!

¹²Amiyizulo eno aqohlo ilove ketoi ninguno panongu munoveni nolo!

¹³Kinikulu kutsasa ninguno ithulu nani eno suxakulu thimeno niki chhitoilu nani!

¹⁴Noghi nigholo sulo, ninguno kiu puka luni keno kumtsu kusajeni.”

¹⁵Inu noye timi hikithipu gholo wukevilo panoqo laghi lono opukhu sunhechileluvelo.

¹⁶Panonguye alhoksa shinikeulo ngosumlake, panonguye ajih peleni keuno khekulhoshi acheni.

¹⁷Nono kughaluniye akeu ghauno juakeloye alichhe shipe qhiakeu adouke,

¹⁸ikemu timi hikithipuqoye alikhi aghenguno alichhe shipe qhi anike, pano lichhe lono pano kitimeluve nani.

¹⁹Suxakulumiye suxakulu lono thive cheni, khunono heqhibuqhi cheni keno hikithipu shive cheni.

²⁰Inijulo! Alokutsuno alaghilalo ngo alhikishia lono kuani,

²¹aphughi hukikhalo eno khile timi kumqo aghini keno tipaqo a lono ighamuku kuani:

²²“Mbomzumiqo! nonguye ado khitotohi anikha shi anishi cheni kya? Nonguye ado khitotohi akighithi shou kuthakugha tsa pipuku ani shi anikya? Nonguye khilemu shikalumo-a kesha?

²³Kughou ino nongu pelo shikithelupe niye sakiyini keno niye akukutsu kivi nongu tsu nani eno ikighithi nongu sasu kusaje nani.

²⁴Niye nongu ku acheni, nongu pelo ighipe niye ku-su acheni ikemu nonguno initsu chemoe.

²⁵Nonguno ikukutsu kumtsu kukuthavetsu cheni eno ipelo nongu shikumzutsu penike pulomoe.

²⁶Ikehu nonguno akijikusapu sholu akelo ino nongu junu nani. Akuighupuno nongu hekulu kelo ino nongu thaigha nani,

²⁷akuighupuno pasapagha toi nongu hekulu eno akijikusapuno miyitsutsu saghike toi, nonguye aghime eno mungamigheyi nani.

²⁸Tileno nonguno alokutsu ku nani, ikemu ino khochilemo nani. Nonguno aqha kumtsulo iphuwuluvi ikemu iphumla nani.

²⁹Nonguno akighithiye avehupu kepi mthae eno pulhapujulo AMPEU gho lunishimoe.

³⁰Nonguye ikukutsu khilemu lunishimoe momu ino nongu shikumzu tsu keulo amlo tsuqhiyi moe.

³¹Tishiaye, nonguno kiu ithulu kuzupu keno tipau ithulu nani eno nolikhi nokumlano nongu ngaqhi nani.

³²Puju shiju mphikeqoye alokutsu milivekeu ghenguno thive cheni. Mbomzumiye alokumsu kuha keu ghenguno kutsapinyive cheni.

³³Ikemu khunono itsa inini keno sushokeu lo xulu nani. Paye alhoksa musakepu kuhano ililayi lu nani.”