Read Sumi Naga AHOLE 10 Bible Online

AHOLE 10 - Sumi Naga bible

AHOLE 10

¹Hipaqoye Solomon holetsake. Alokutsu nuye apuhno akijivilo cheni; anikha nuye paza mlo ghimepu sughi cheni.

²Amikucho kumo lono akini ithulukeuye okivipu kiumu shi mlae, ikemu amikuchoye okuxu puxulu nani.

³AMPEU ye timi kivimi pelo akhuava shiapemo nani, ikemu kixikilamino lunishiakeu pano suchilepe qhive nani.

⁴Akipichino opelo kumlhomi shivepe nani ikemu akagha shi mlakeuno noye kinimi shilu nani.

⁵Kumsukulumiye tuxatini piti teve kelo xope pekutsu cheni; ghile tsala ghulokilo zuauve kemiye kujomzave cheni.

⁶Timi kivimiye kukumgha ithulu nani, Kixikilami tsapino pa lhoayehlo heqhi buqhi chekeu nhape acheni.

⁷Timi kivimi ghili kumsukuluye kumghakeu lakhi ke, ikemu kixikilamiye itheno kumsumave cheni.

⁸Kumsukulumiye akukutsu tsa kivi ikhilu cheni. Timi khunono anikha tsa picheni keno pano shipusavekepu ighi nani.

⁹Amikucho shi xuchekemiye sushokulu acheni ikemu vimokemiye pano kumlano kughaluve cheni.

¹⁰Khualano kuchou suchilepe qhiveaye akupuna huthu cheni ikemu khunono thebei shipuzu kutsala kilejuni keno alakishipu shi acheni.

¹¹Timi kivimi tsapiye akuxupu zupukike ikemu kixikilami tsapiye pa lhoayehlo heqhi-buqhi chekeu nhape ani.

¹²Akimthino akupuna xukutho cheni ikemu kikimiyeno akipimi kumtsu jonhavetsu cheni.

¹³Tsukhuikemiye alokutsu tsa picheni ikemu mbomuzumiye aghime tsu kuzupu shive cheni.

¹⁴Alokutsumiye shiluke thaqhu akighithi pekutsulu cheni ikemu anikhamino atsa piaye akupunaye kupunu auvae.

¹⁵Kinikuluno kinimi susho cheni; aquaghano kumlhomi kutsave cheni.

¹⁶Akivi shikeu saxuye akuxuke ikemu kixikilaye axinelo sawu nikeu likhie.

¹⁷Khunono kutamino pano shikumzu tsukeu chiluni keno xulu nani ikemu khunono pa kipimi ikhilumoni keno akuighupulo ani.

¹⁸Khunono pa mlolo mithichekeu susuni keno paye kimkimike. Khunono axikishi pekulha cheni keno panoye anikhake.

¹⁹Nono khijehi alau atsa pini keno noye axine shinikeu shi aghiluvike. Noye alotsu aghi napiaye iqunei akepuke.

²⁰Timi kivimi tsaye tsandiyi kuchou toike; kixikilami tsapiye ame kuhae,

²¹Timi kivimi tsaye timi kutomo vehupu kighishe tsu cheni ikemu mbomzuno olikhi opithive kepu shi nani.

²²AMPEU kukumghano noye kinikulu shilupe cheni; aka-agha shi mlakeuno opelo kinimi alau shilupeni chemoe.

²³Alhoksa kumla shikeulo aghuilo qhiyi keuye anikhake. Tsukhuikemiye alokutsu lono aghuiloqhiyi cheni.

²⁴Amikuchomiye panono lunishikeu ithulu cheni ikemu kixikilamiye panono ighono msache keu sholu nani.

²⁵Pasapagha ighino kixikilami fupewuve ikemu amikucho shi xuchekemiye pulhapuju xaluve cheni.

²⁶Khilemu akipichimi sawo okumla shipe kevilo; paye ohuno akiqhi chulu akeshi momu amichhino onhethi phochhe keshi pano omhoqhi nani.

²⁷AMPEU gholulo eno noye axushu nani. Kixikilamiye akithido tomphi lono thive cheni.

²⁸Timi kivimino laju chekeuye alokivipulo sawu cheni ikemu kixikilamiye kiumu laju akepu kuhae.

²⁹AMPEU no kuchou shi xuchekemi susho ikemu akumou shichekemiye kutsapinyive cheni.

³⁰Amikuchomi timiye pulhapuju sushokulu anani ikemu kixikilamiye pano yeghilo xusumla nani.

³¹Amikuchomiye alokutsu tsa picheni ikemu alhoksa piche keu miliye lakhave nani.

³²Amikuchomiye kiu pikepu keno ithi ani ikemu kixikilamiye pulhapuju ghuzakepu tsapi picheni.