Read Sumi Naga AHOLE 11 Bible Online

AHOLE 11 - Sumi Naga bible

AHOLE 11

¹Khunono ahhu kuchou kumo peitha cheni keno AMPEU ye tipaqo ju aphimuqhu cheni. Paye ahhutu achipiu lono peithakeuno palo cheni.

²Kughou aqhekuza ighini keno tipaulo kujomzakepu ighi cheni. Aqhokigheu shikeulo alokutsu alau ani.

³Akumzumiye pa mikuchono sacheni ikemu xesuxenimi ye pano mikucho kumono panoqo kutsapinyive cheni.

⁴Okithi tsalalo kinikuluye okivipu shimla nani ikemu amikuchono okuxu xaluve nani.

⁵Amikuchono kivimi pelo pa kuxulo ililai chenipe ikemu kixikilamiye pa likhi pa xakuluqhive cheni.

⁶Amikuchono achipishi xuchekemi saphelu cheni ikemu xesuxenimiye pa lakimineno meluve cheni.

⁷Kughou kixikilami thiveni keno pano lajuchekeu ghi pa gholo no thive cheni. Akini shou pukhube chekeuye kiumu shimlave cheni.

⁸Amikuchomiye akupuna launo susholuve cheni, tipau zuqhu shi kixikilami lau ighi cheni.

⁹Alhou mthakemi tsapino oshipusave luvi kemu amikuchomi lokutsuno oxakulupu shi nani.

¹⁰Amikuchomino kuakini shilukeulo aphughi lakhiye alovi cheni eno kughono kixikilami thiveni keno tilehi alokivishi ighakeu acheni.

¹¹Kughono amikuchomino aphughi lakhi shou kukumgha be tsuni keno tipau phughiye kije shiwuve cheni, ikemu kixikilami tsapino aphughi lakhi shou shikupsa sughi cheni.

¹²Timi kutami jukunatha ghi pi shikeuye aghuzunikhake. Nono kumsukulumi shi-aghiaye noye inaqhoive nani.

¹³Khunono timi xishi cheni keno tuqhou tsa tipaqo lau qhi mlae, ikemu khunono pichebekulumi keno pa lau pukhubekulu qhilu cheni.

¹⁴Khilehino kichekipiyemi kuha keno timiqoye veqhive cheni ikemu akukumsu peithakithimi kutomo akeulo sushokulu ani.

¹⁵Nono inaghami pi agha lotsuni keu shi piqhiaye mulochile nani, ikemu nono chhosumo napiaye oghenguno tino akiviuke.

¹⁶Kimiyekinimi totimiye kutamino gihu sumsa cheni ikemu ghushoghili kivi kukuha totimiye kujomzakepu ani. Akipichimiye pisa ithumla nani ikemu tshathu mula kemiye kinimi shilu cheni.

¹⁷Nono ivunhei shiaye okivipu shianike. Nono ayikusa shiaye olikhi oghuza anike.

¹⁸Kixikilamiye ajume ghi pishikiqhi qelu cheni ikemu nono achipiu shiaye asaxu kuchou ithulu nani.

¹⁹Khunono amikucho shinikeulo amlo ithamono acheni keno panoye xulu nani ikemu khunono tsuyikhomo akumou shi acheni keno thi nani.

²⁰AMPEU ye akukumsu lhoksami mithi cheni ikemu achipiu shichekemi kimiye cheni.

²¹Alhoksamiye ghimeqhi nani kepi mutsuqhei ithilo ikemu amikuchomiye poluve nani.

²²Totimi lakhiye ajuvi aghinamu visavili kuha aye awo nheghulo shuna nguthi puakeu paphike.

²³Timi kivimino kiu lunishi keno tiye pulhapuju akiviu shiaghi cheni; kughou kixikilamino lunishi akeno ithuluveaye timi kumtsuno amlo ideve cheni.

²⁴Timi khamiye pisa inapugha peitha keghi alau kinimi shi cheni. Kutamiye kutokupui akeghi kumlhomi shikithe cheni.

²⁵Kupumono tsulo eno noye alau kighishe wolu nani. Kutami kuphulo eno okuphukeu shinani.

²⁶Timi khuno ame akiqheu lono jelukeu do kheniaye athi hekutsupe qhicheni keno timi kumtsuno pa ghusho cheni ikemu timi khuno jetsu niye ikhipheni keno tipano akishe tsucheni.

²⁷Nono akivi mijiche che aye oqhoqhu gihu nani ikemu nono akupunalo amlo tsuche aye tithono kutau ithumlae.

²⁸Khunono pawu kinikulu pukhu cheni keno ighuyiveno ighiqive nani ikemu amikuchomiye mutsu tsuni nipa toi kighishe wolu nani.

²⁹Khunono pa kibolo akupuna sughini keno abokumsa iyighilu nani. Mbomzumiye pulhapuju alokutsumi qemi shi nani.

³⁰Amikuchono akuxupu tsucheni ikemu hekiqhi bukiqhi no tipau ikhisuwuve cheni.

³¹Akivi shichekemiye ayeghi hipau lono asaxu ithulu cheni ikemu kixikilami ngo axinemiye aghime sholuni putsae.