Read Sumi Naga AHOLE 13 Bible Online

AHOLE 13 - Sumi Naga bible

AHOLE 13

¹Alokutsu nu lakhiye pa puhno kutsukeulo amlo tsuqhiyi cheni ikemu qhezalaki kemiye sakiyikeu initsu chemoe.

²Timi kivimiye panono kiu pikeno tipau saxu tsucheni ikemu pishikiqhimiye heqhi buqhi nikeulo khekulhoshi acheni.

³Nono pikeulo kutokupuilo eno okuxu susholulo. Kutokupui mono zale kemiye pa likhi pa kutsave cheni.

⁴Akipichimi lakhino kiuala thotsu mine anamu kiumu ithumla nani; azukinimiye pano lunishi akeu tipau ithulu nani.

⁵Kuchou shi xuchekemiye akimki mithi cheni ikemu kixikilami tsaye kujokepu eno kuthakughapuke.

⁶Akumzumiye amikuchono putukhape acheni, kixikilano axinemi xakuluqhi cheni;

⁷Timi khamiye kinimi shike ghili shicheni ikemu kiumu kuhake. Khamiye kumlhomi shike ghili shi cheni ikemu kinikulu shi acheni.

⁸Kinimi lakhiye pa kuxu xaluniaye pisa peitha cheni ikemu kumlhomi kichi anamu kiumu ithumlae.

⁹Amikuchomiye akuvu lakhi toi yevuqai acheni; kixikilamiye akulu inhewu chekeu toike.

¹⁰Aqhekuza akulaki ye akupuna thono kiumu shimlae, ikemu akukutsu tsa iniju keuno alokutsu alau shi cheni.

¹¹Nono khijehi mlaleyi shino okini ithuluni keno tipaphi lono payi puhave nani. Khijehi aghime shino qeluni keno titohi kutsukiyi pualu nani.

¹²Kughono lajupu chunudaveni keno amlo hephove anike ikemu lajupu huno kuchou shi ighiaye alokivino chhitoive nani.

¹³Nono akukutsu kivi milive aye akupuna khuanike; akukutsu kivi papeche aye oxalu nani.

¹⁴Alokutsumino kutsupiye keuye akuxu zupukike; kughono akuighupulo akuxu iloveni keno tipauno opelo pojolu penike kuphulu nani.

¹⁵Tsukhutsuvai keuno sukumsa qelu cheni ikemu pichebe mlakemi ye kutsakungo keu laghilo che cheni.

¹⁶Kumsukulumiye panono mla nike zuuno kumsuju paghi cheni ikemu mbomzumiye pa yekumtha zale cheni.

¹⁷Pulubekumla ghinikishimiye akupuna huthu cheni ikemu pukhubekulumiye alakishi sughi cheni.

¹⁸Akukutsu tsa milive kemi salaye athokha eno akukujo ke. Khunono shikumzu tsukeu chiluni keno paye kutamino gihu cheni.

¹⁹Nono kiu lunishi ani keno tipau ithulukeuye kiutoi alo kepu kela! Mbomzumiye alhoksa launo tsughuveni keu mopi cheni.

²⁰Alokutsumi gholo kulojilo eno noye alotsu nani. Nono mbomzumi sasu shou-pau shiaye oshipusave nani.

²¹Aqha kumtsulo akupunano axinemi pape cheni, ikemu amikuchomiye thime kivi pesu pa saxu shitsu nani.

²²Timi kivimiye pa tianuli kutolo kinikulu qhipuatsulu cheni ikemu axinemiw kinikuluye amikuchomi lau wuve cheni.

²³Kumlhomi ghenguno aluza kukughu puakeulo no achuqupu kupukunoshi ipeghiluvi ikemu tipau luza chinikeu amikucho kumomino lakhave cheni.

²⁴Nono onu sakiyi ghime moaye pa kimiye chemoke. Nono pa kimiye cheni aye pa shikumzu nani.

²⁵Amikuchomiye chukepu lukumkha shi acheni, ikemu kixikilami ye pulhapuju muzuthi acheni.