Read Sumi Naga AHOLE 14 Bible Online

AHOLE 14 - Sumi Naga bible

AHOLE 14

¹Totimi lokutsuno akibo shiqhe puku cheni ikemu aghuzunikhano kutsakungove cheni.

²Kuchou shilo eno tino noye AMPEU gholu anikepi piye anike; kuchou kumo shikeuno noye AMPEU gholu chemokeu piye anike.

³Kughuzumiye pa qhekuzano pa pelo atsa chilo pichenipe; alo kutsumi tsaye pa likhi pa susholu cheni.

⁴Alu hokikide mishitsu kuha keloye obialeye kumsa shive nani ikemu tipau aghiaye obi aleye athino chhitoilu nani.

⁵Pulubekulu thopimiye pulhapuju kuchou picheni ikemu pulubekumlamiye akimki thono kiumu pilu chemoe.

⁶Alikhi apulupivi kemiye khilemu alotsuni chemoe ikemu tsukhuyi kemiye pai shikalu cheni.

⁷Kughuzumi launo putosuvelo; panonguye oshika kepu kiumu kuhake.

⁸Shitsamiye kushiye alotsu kya? Kughengu kiu shikepu keno paye ithianike. Kushiye mbomzumiye anikha shi cheni kya? Kughengu pano ithi anikepi kumsu kehue.

⁹Aghuzu nikhamiye panono axine shie pinamu kiumu jukutokugho chemoe ikemu kivimiye axine pevetsu penishi cheni.

¹⁰Alolo alokivi akeumu kukhu kimiji akeumu owke, khunomu osasu tipaqo kusaje mlae.

¹¹Alhoksami kiye kutsave namu akivimi kiye ixa iqimono ngolu nani.

¹²Alaghi khipau achipi kepi nono kumsu ani keno tiye akithipulo sailove kepu shiaghiluvike.

¹³Akununo amloksa nhaluvi. Kughono alokivi cheveni keno pulhapuju tilehi amlo ghime anie.

¹⁴Alhoksamiye panono ithulu kuzupu qhemi ithulu nani. Akivimiye pano kumla saxu tsu nani.

¹⁵Anikhamiye kiukiumu pulu wuve cheni; kumsukulumiye pano ikache wunikeu jukuto cheni.

¹⁶Alokutsumiye akupunalo ilomonike kutokupui cheni ikemu mbomzumiye jukuto kugho keu kuhano pai mla ithave cheni.

¹⁷Ajih kumqhomiye anikha kumla shi cheni; alokutsumiye iquighayi acheni.

¹⁸Ayehkumthamiye pano ghuzunikha qhemi kiu ithulukuzupu keno ithulu cheni ikemu shitsamiye akighithi saxu ithulu cheni.

¹⁹Alhoksamiye amikuchomi zulo itsaiqino pano lopu shitsupenike aqhokigheu lono qhuiniju masave cheni.

²⁰Kutami likhike kumono akisughumi thotsu kumlhomi ju alo chemoe ikemu kinimiye shompami kutomo acheni.

²¹Nono alokivi shinishi aye kumlhomi kimiyeqhiyilo; timi jumithi keuye axineke.

²²Nono akivipu ghenguno mlache ghi aye kutamino ogihu eno osumsakeu qelu nani; nono alhoksa kumlaghishi aye noye shipimi anike.

²³Mlalo eno noye xuakulupu qelu nani; nono iqa kuhono atsapi aye kumlhomi shive nani.

²⁴Alokutsumiye kinikulupe asaxu shi ghi pano tsu cheni ikemu kughuzumiye pano nikha likhi timi pelo ithi chenipeke.

²⁵Thopimi lakhino kuchou tsa pikelo timi kuxu xalu anie; pano akimki shepe shiaye timi pesu jechuve anie.

²⁶AMPEU sumsakeu huno timi lakhi pelo eno pa kibo pelo kutami mlo chulu eno sushokulu achenipe.

²⁷Noye akithipu lichhe lono poluve nishi anima? AMPEU sumsakeuye akuxupu zupukike.

²⁸Akukauye khipahi kijekeno tiye timi khijehi shou pano ayehpe ani keno tileno ithi ani; timiqo kuhakeloye paye kiumu kumo ake.

²⁹Iquneyi chekeiye alokutsumike ikemu ayiksami ye mbomzu likhi piye anike.

³⁰Amlokiqi no aphimpi eno ashi aji kivishi chenipe ikemu anhekushuye angsu kusu toike.

³¹Nono kumlhomi qhasu cheni aye tipaqo lhokeu Alhou thaigha anike ikemu kumlhomi tsu jekeu ye Alhou mllakeu kumla shianike.

³²Kixikilamiye pano kumla lhoksano pano likhi pano xaqhikulu cheni ikemu timi kivimiye mutsumisheyi xu chekeuno pano susholuve cheni.

³³Alokutsuye tsukhutsuvayi kemi kukumsu kumtsulo ani; kughuzumiye alokutsu ghili kiumu mthake.

³⁴Amikuchono ashiayeh lakhi pesu kije shipe cheni; axine ye khuno khuno shiayeh ghengunomu akukujopu ke.

³⁵Akukauye pa qholo kijemi kutshathu kemi shou alovi cheni ikemu pa loghuye titoimokeqo shou ikughi cheni.