Read Sumi Naga AHOLE 15 Bible Online

AHOLE 15 - Sumi Naga bible

AHOLE 15

¹Mutshaminhei khochile keuno amlo kighide hekuqusu cheni ikemu atsa kumkano amlokighide xukutho puku cheni.

²Alokutsumi tsapilo akighithi aloqhi peitha cheni ikemu mbomzumi kichi lono aghuzu tsa piphe cheni.

³Khile khileno kiukiu shiaghi namu AMPEU no ithulu ani; akivi mula ani keo alhoksa mula anikela paye ningu jukuto ani.

⁴Kimiyekini tsano akuxupu sughi cheni ikemu ayikusa tsano ongu agha chunudavetsu cheni.

⁵Opuhno kiu oshika keno tipau kughuchove keuye aghuzu nikhake; pano shikumzu keu luaye tiye alokutsuke.

⁶Amikuchomiye pano kinikulu qhilu cheni ikemu kixikilami ye akijikusado ighikelo tipaqo puhave cheni.

⁷Akighithiye alokutsumino vekuphawolu cheni kethono kughuzumino kumoe.

⁸Kughou timi kivimino inikhuni keno AMPEU mloqi cheni ikemu kixikilamino aghashipe pa mlla nike sughikeu mithi cheni.

⁹AMPEU ye alhoksami laghi mithike ikemu khunono achipiu shicheni keno tipaqo kimiye cheni.

¹⁰Nono achipikumou shi aye aghimepu otsu nani; oshikumzupe nikeu nono alepimo aye noye thive nani.

¹¹Kithimi yeghiqhalo ghi kiushi ani keno AMPEU no mthakeu kuhae; tishiaye kishi puzu timi lakhiye Alhou launo pa kukumsu kusuluni kya?

¹²Alikhi apulupivi kemiye pano shikumzutsu penishimoe; panonguye khilemu panonguno alokutsumi vilo akukutsu inijuni chemoe.

¹³Timino alovi akelo kunuvuqai cheni ikemu amlo sakeloye panonguye thibui ithulu cheni.

¹⁴Tsukhuyi kemiye shikakeu lunishi ikemu mbomzumiye pano yehkumthano aghaqiqhiyi auve cheni.

¹⁵Kumlhomi kuxuye akuxu kupujulo ichheime acheni ikemu alokivimiye pulhapuju akuxulo alokivi lono xu acheni.

¹⁶Kinimi shipuzu akupunabolo akepuye kumlhomi shipuzu AMPEU sumsakeu pavike.

¹⁷Ashi-akha kivi chua-namu kimthikile anikeu zuqhulo nono kimiyekile kemi sasu ayetsuni chukeuno akiviuke.

¹⁸Ajih kumqhomiye kighekile keu huthu cheni ikemu kusuqhi keu lono alakishi ani.

¹⁹Nono akipichi shi aye aqha kumtsulo akijikusapu sholu nani ikemu nono kuchou shi xuaye akupuna kiumu kuha nani.

²⁰Alokutsu nu lakhiye papuh lopivitsu cheni. Anikhami likhino aza thaigha cheni.

²¹Mbomzumiye pano ghuzunikha pesu alokivi shi acheni ikemu alokutsumiye kiuno achipi keno tipau shi cheni.

²²Kutolu kivi thaqhulo kutamino kishi kumsu ani keno tipau lulo eno noye tokulu shi nani; tishimoaye noye tomove nani.

²³Aghuloki kiqi lono atsa ghi achipiu phulu keaye kiutoi alokivipu kela!

²⁴Alokutsumiye akuxu kunguu saiku kepu laghilo checheni; akithi pulo aqhou iqivechekeu laghilo sawu chemoe.

²⁵AMPEU no qhezalaki chekemi kibo kutsave nani ikemu pano chimemi nhemgha susholu nani.

²⁶AMPEU no alhoksa kukumsu mithi cheni ikemu paye shompami shilukeu tsalo amloqi cheni.

²⁷Amikuchokumo lono kighisheluniye pukaputsa aye noye akibolomi sasu akupunalo ilove nani. Kulugho tsukeu lukevilo eno noye axushu nanike.

²⁸Akivimiye panono khochile mphi lono kumsuju paghi cheni. Alhoksamiye payi khochileve cheni ikemu tino akupuna huthu cheni.

²⁹Kughou akivimino inikhuni keno AMPEU no initsu cheni ikemu alhoksami launo paye putosuwuve cheni.

³⁰Agikuvu sholu kelono alopivitsu cheni eno kiyephi kivino opelo alau aloqilu chenipe.

³¹Kughono oshikumzukeno nono amlo tsuqhiyi shi aye noye alokutsumike.

³²Shikaluni keulo nono mopi auve aye olikhi oghuza ani. Shikumzutsu keu ikhilu aye noye alotsu kithe nani.

³³AMPEU sukumsaye alokutsu kukutsuke. Noye agigihupu ithulunike zuuno aqhokigheu shipaghi masae.