Read Sumi Naga AHOLE 17 Bible Online

AHOLE 17 - Sumi Naga bible

AHOLE 17

¹Akupuna kilo chukhakumoshi ilhuakeu nguno amlo iquneyi ashokoza chu akeu pavi.

²Amqukini qeuye aki mipeu nu amekukuhau shou akukagha peitha wuve cheni eno amheghi saje iyighilu cheni.

³Shuna ngo tsandiyiye ami pesu ghu kimtheju cheni eno timi mloye AMPEU no peju cheni.

⁴Alhoksamino alhoksa kimjitsa ini cheni eno kimkimino akimki tsa ini cheni.

⁵Nono kumlhomi junuaye panoqo lhokeu Lhou thaigha ani. Khualano ahakusapu sholukelo amlokiqi shicheghi aye noye aghimepu otsu nani.

⁶Itimino panoqo papuh jupesu akijiviloke toi muchomi no pa tilimi jupe akijivilo cheni.

⁷Timino sumsa chekemiye akimkitsa pichemoe ikemu kughuzumiye amekuapu kiumu piqhimlae.

⁸Khamino kumsukeuno kulugho ye kudu-u shiakeshi thwokha shiluve nani kughashi pulu cheni.

⁹Timi pelo oju alope nishi aye olau akumou shikeu kipimi pevetsulo. Akumou shikeuno shompami shiakeu hephove nani kepi kumsupu achelo.

¹⁰Tsukhuyi kemiye ghuthu lakhi sakiyikeu lono kutomo shikaluve cheni ikemu kughuzumiye ghuthu 100 ghaqhi kethiuno ti shikaluvi.

¹¹Kixikilami akupuna xukutho chekemi ghenguno akithiye aghinikishimi ayiksa lakhi toi ighi nani.

¹²Kughuzumino pawu mbomzu kukughu shi aghi keu sholuni ke zuqhulo avaqu ati luvetsukeu sholuke pavi.

¹³Nono alhoksa pesu akivi lochile cheghiaye alhoksaye okilono khilemu ipemoae.

¹⁴Mutomushu huthu keuye azu khetha puakeu mpale ipeghi aketoike; tinguno alau wumphi lono tipau lakhaluvelo.

¹⁵Pimimokemi kileqhikeu momu kixikilami pelo wuvepe keuye kinikujo AMPEU no mithi cheni.

¹⁶Kughuzumi ghenguno akighithi ithiniye pisa puwove akeu kiumu akivipu shini chemoe kughengu paye tile amlo tsu chemoke.

¹⁷Shompamiye pulhapuju kikimiye piyekile cheni. Shiluksa kusajeniye kethono kiume athikuzumi shiani kya?

¹⁸Kumsukulu kuhakemi likhino kutami pi agha ghenguno amakho puluve tsunikeu piqhi cheni.

¹⁹Axine alocheni aye akupuna shinishi chenike. Ado kumtsulo nono tsutsungoju cheni aye noye akupuna khuanike.

²⁰Khu khumu alhoksa kumsu eno tipau piche aye paye akivi kiumu huqhe akepu kuha ikemu akuxu pukhule keu likhi anani.

²¹Anu khipauno anikha kumla likhi shicheni keno papuye amloksa ngo amloghime thono kiumu kuhae.

²²Aloqhaqhilei keuno oshi aji kivi shiachenipe. Alhokuthulo agi kuzumiye asheshino thiayeake.

²³Kusakugha kughakuthami qono tuqho tughouno kulugho tsukeu luveno kuchou xakutha shitsu chemoe.

²⁴Vethakulumiye alokutsu kumla miji cheni ikemu kughuzumi nhethiye aqha kumtsulo jupuwo acheni.

²⁵Aghuzunikha nuno papuh mlo ghimepu sughi cheni eno kukhukimji kukumsu aza lau sughi cheni.

²⁶Pimimokemi pelo asukuchu tsupekeuye achipi kumoe; timi kivimi ghimeqhi keuye kuchou xakutha shipusave anike.

²⁷Timi khamiye pano thebei ithi anamu ado kumtsulo zale khave chemoe. Timi khunono iqunei ani keno tipanoye jupililukeu kuchou anie.

²⁸Kughuzumi ghi inaqhoi pa kichi xukhomono auveaye alokutsumi eno tsukhuyi kemi kepi kumsuve cheni.