Read Sumi Naga AHOLE 2 Bible Online

AHOLE 2 - Sumi Naga bible

AHOLE 2

¹Inu, ino kiu oshikapiye ani keno shikalulo eno ino ovilo kiu shilopini keno khilemu kumsuma kevilo.

²Alokutsuye kiu keno inijulo eno tipau ithitoilu nike pukaputsalo.

³Iye, akighithi khulo eno jupili kulupu khulo.

⁴Nono aghimeshi tsandiyi momu kiuala kini khuki kusupe puakeu phujuwu akeshi tipau phujulo.

⁵Tishiaye Alhou sukumsaye kiu kiqi keno nono ithi nani eno Alhou ghili shikaluni keulo tokulu shi nani.

⁶Kughengu AMPEU no alokutsu tsucheni eno pa kichi no akighithi ngo vethakulu ighi cheni.

⁷Pano achipiu shichekemi amikuchomi ghenguno akukuphu ngo sushokulu kutope ani.

⁸Khunono aghibiu lono kutami peitha cheni keno pano tipaqo susho cheni eno pa lau amlo tsuqhiyi kemi pano khepe acheni.

⁹Nono itsa ini aye achipiu, amikucho eno aghibiuye kiu keno ithi nani. Nono kiu shikepu keno ithi nani.

¹⁰Noye alotsu kithelu nani eno okighithino alokiqipu tsu nani.

¹¹Ithitoilu keu ngo jupilikuluno osusholu nani

¹²eno akumou kumla shi nikeu lono ohakhalu nani. Atsa lono akupuna xukutho chekemi launo okutashiluvepe nani.

¹³Timi titoi keqoye axine zuchiyi keu kuxulo xuniaye kuchou kuxu qhivekemike,

¹⁴eno akumou kumla shikeu lono alokiqipu phulu kemiqoke eno kumsukulu kuhano alhoksa shichekemiqo ke,

¹⁵pukhubemla kemi eno pichebemla kemiqoke.

¹⁶Ghaghu totimino mulominiyi oputsano ozuluve niye pukaputsa keulo noye tuchile kulupu shi nani.

¹⁷Liye akimino pulube mlakepu shive cheni eno liye akimthe shoqhi pheve cheni.

¹⁸Nono li kilo wuaye kithilalo wu cheni-a. Tile wuaye kithimi yeghi toayeake.

¹⁹Li xujuwukemi lakhimu athiu ideghilu chemoe. Paye khilemu akuxupu laghilo ideighi chemoe.

²⁰Ike noye timi alokemi laghi pulalo eno amikucho shi xulo.

²¹Kughengu amikuchomi, kikhikighi mino niyeghi hipaulo xuache nani.

²²Ikemu kixikilamiye Alhou no ayeghi lono sunhe sawuve nani eno asubo nhuve keshi timi muquqhi chekemi ikhi pheve nani.