Read Sumi Naga AHOLE 23 Bible Online

AHOLE 23 - Sumi Naga bible

AHOLE 23

¹Kughou nono timi akhotomi sasu chuniye iqani keno paye khuu keno kumsululo.

²Nono chunishi kutu aghinamu olikhi ohakhavelo.

³Pano achuqupukiu kutope qhitsuke ghenguno mihemuza kevilo, paye omiqe juniye shiaghiluvike.

⁴Kinimi shiniaye okuxu pepuzuveno kulhokugho shimonike alotsulo.

⁵Owu pisaye aluqu lakhino achishibo ipeghi puzu yeuveke toi paikhavino tipaqo hauve luvike.

⁶Michhimighi kemino chuchekeu-alo kuchukusho shikevilo momu pano achuqupu kivi kutope qhitsukeu mihemza chukevilo.

⁷Pano “Ighilo kitishe lulo” ipi nani, ikemu paye kuchouno ti pianike kumoe. Pano kiu kumsu ani keno tino pa ghili kuchouke.

⁸Nono kiu chusuve akeno mughupheve nani eno atsa kuju pikeu kumtsu adou shive nani.

⁹Akuputo tsape anikhami putsa kevilo; paye tipau avehupu kepi ithimo nani.

¹⁰Apu asu lono shopuaghi keu lughi tusho khilemu kiqe kevilo momu mighimghano pighiakeu kialu luve kevilo.

¹¹AMPEU no akumtoshi panoqo saphu cheni eno panoqo ghenguno pano oshou piqakepu auve nanike.

¹²Okukutsuu lau amlo tsuqhiyi shipuzu nono toluke thaqhu ithikupha luvelo.

¹³Atianuli ghasu qophenikeu suchile kevilo. Akihepusuno pa hevemu paye thivemo nani.

¹⁴Kuchouloye, tino pa kuxu xaluvi.

¹⁵Anu, nono alokutsumi shive aye niye ighono alokivishi nani.

¹⁶Nono alokutsu tsa piaghikeu ino chilu kelo niye akijivilo nani.

¹⁷Axine shichekemi jumine kevilo; AMPEU sumsani keuno okuxulo alokumsu shilo.

¹⁸Hipau shi aye okuxu vuqai kepu azuu anike.

¹⁹Inilo, inu alokutsu shilo eno noye kiu la pulaghi xucheni keno tsaqui kumsujulo.

²⁰Timi khunono aji ihulo sho cheni momu mihemuzai chu cheni keno tipaqo gholo xukevilo.

²¹Shokumzumi eno mihemzakemiye aquagha shi hailove cheni. Okuxulo chu eno shokeu likhi shiche aye noye pai aphimini itamujui uniake.

²²Opuh tsa inilo kughengu pa kuha aye noye aghimo nicheke. Ozano topumi shivekelo li thaigha kevilo.

²³Kuchou, alokutsu, akighithi eno akukumsu kivi, hipaqoye ame tsukuzuke oghenguno tipaqoye ame kushoke jekevilo.

²⁴Amikuchomi papuhye alokivi shikepu akiqi kivi anike. Noye alokutsu nu jupe akijivilo kepu anie.

²⁵Opuh ngo oza pelo ojupe akijivi pelo; tipau lokivi oza tsulo.

²⁶Anu, amlo tsuqhiyi shilo eno ikuxuno okichekipiye shipelo.

²⁷Kutuqhalimi eno totimi ghaghumiye akithipu lichheke.

²⁸Panonguno suxakulumi toi okhe acheni eno timi kutomo pelo amlo pumove chenipeke.

²⁹Khunono amlo ghime eno amlo kusapu acheni kya? Khunono mutomushu keu eno muchho cheni kya? Khuno kutsazuno azakupuni kya? Khuno anhethi huchuyikeu pucheni kya?

³⁰Tipaqoye khunono aji vapesu kushuwa ngo cheni eno aji lekite keu sho acheni keno tipaqonoke.

³¹Aji ajukhulo mlaghubeyi aghina, mutshaminheyi qoilo aghie pinamu aji huchuyi keuno omsuluve pekevilo.

³²Thanau noye apighi tughukupuno omighi keshi ithughi nani.

³³Onhethilo jukuighupu shi ipeghi nani eno noye mutsumishei atsa pimla eno kumsumla nani.

³⁴Noye azughilo izuwu puzu azughi jupe azuzu eno ashukaki kulokuloi keulo kunguu akighilo fupe akeshi ophi sukidi nani.

³⁵“Kiu kelano ihekuluveke, ighaqhi hekuluve keniake, ikemu niye kumsumlave kena! Niye kushiye idamla kelae! Niye itaghi kumqa lakhi shokepu shivae,” ipi nono pi nani.