Read Sumi Naga AHOLE 24 Bible Online

AHOLE 24 - Sumi Naga bible

AHOLE 24

¹Alhoksami jumine kevilo eno panoqo sasu shompami shinike pukaputsa kevilo.

²Panonguno kumsu chekeuye akupuna huthunishi acheni; panoqo tsa pi kumtsulo timi khami ghuzave cheni.

³Akiboye alokutsu ngo vethakulu pesu aboqha shipuzu shipuku cheni.

⁴Khileno akighithi ani keno tilehi thime jukivi ngo amekushopu pesu aki bokuthaqo koghekughu shicheni.

⁵Alokutsuye akumto nguno akiviuke; iye, akighithiye ashi aji kumto nguno akhotouke.

⁶Noye aghushi mphi lono tsaqutsalei kughu paghi masake eno akukutsu kivi khije alau ithuluni keno noye tolunikeu alau anike.

⁷Mbomzumi lakhi ghenguye alokutsu tsa ithi ilo tonikeu tholoke. Kughono akhoto vehu kuptsa ani keno paye kiumu pikepu kuhave cheni.

⁸Nono pulhapuju alhoksapu likhi kughupe acheni aye noye akupuna shichekeu lono oje pipiniake.

⁹Kiu kiumu kughuzumino kughupe aghikeuye axinepuke. Timi khuno kiumu kumoamu kutami likhi jukunatha cheni keno timi kumtsuno pa mithi cheni.

¹⁰Avekusalo nono miqemileyi aye noye kuchouno miqemilei kemike.

¹¹Timi khuala achipi kumou lono pithiveniye shiaghi aye noye amlo lipikevino pa xaphevelo.

¹²Tiye okumla kumokepi nono piaghiluvi ikemu omlolo puakeu Alhou no ithi eno tipau shou kughatha nani. Pano okheju acheni, pano ithi anike, eno nono kiu shikeno tipau qhemi asaxu otsu nani.

¹³Anu, akhingozu ye aloke chulo. Akhi lha lono akhingozu sughikeuye omililo ngoniyike toi

¹⁴ongulho ghenguno alokutsuye alokepi mutsuqhei shilulo. Alokutsu lulo eno ighinikeulo noye akuxu vuqaikepu ani.

¹⁵Kixikilami khuno amikuchomi pukaqhi eno pakibo sawuve tsuniye amuqu shicheni keno tipau toi shikevilo.

¹⁶Kuchou shi xuchekemino ghuthu khijejehi veqhive aghi namu paye ithughikitheve cheni; ikemu zuleno kutsakungo keuno kixikilami puhave cheni.

¹⁷Kughou oghumino zuleno kutsakungo sholuni keno alovi kevilo eno pano kupxalu kelo alokivishi kevilo.

¹⁸Omlo qui ikighi anikemokeno AMPEU no ithi ani eno paye tipau lunishi chemoe; eno tishiaye paye paghimemo luvike.

¹⁹Alhoksami pelo opunaqhi pekevilo, noye panoqo jumine kevilo.

²⁰Kixikilami lakhiye xuakuzupu kiumu kuhae, kiumu laju akepu kuhae.

²¹Inu, AMPEU sumsalo eno akukau gihulo. Panoqo shou hebide chekemi gholo noye kiumu chhosu kevilo;

²²timi titoi keqoye asuchedo lakhi lono shipuhave nanike. Noye Alhou momu akukauno zuleno akuxu kutsakungove kulupu kuka akeu ithi anima?

²³Alokutsumino hipaqo ghi pipe puatsuake: Kughakuthami lakhino agi jukeuye alomoe.

²⁴Pano pimipuakemi pesu pimimokemi kepi xatha tsuaye timi kumtsuno pa mithi eno pa ghusho nani.

²⁵Ikemu kughakuthami khunono akipimi shipua ghikemi ghimeqhini keno paye kinikulu shi nani eno ajekivi ithulu nani.

²⁶Kuchou shi khochilekeu michiye shompami kuchou michike.

²⁷Oyikulu kutolu mphi eno nono qechukulupu laghi mutsuqhei shimphiloye noye aki shikevilo momu akibo shi kevilo.

²⁸Akiqi akivi kuha keloye timi kutami shou thopi tsa pipuku kevilo momu pa ghili akumo akukuhau pikevilo.

²⁹Khilemu, “Pano ilau kiu shikeno nighi tipa qhemi pa tsunike,” ipi pikevilo.

³⁰Akipichimi eno mbomzumi luqa ngo atsayilu ino vechesu wuke.

³¹Ike tipaqolo asahubono ghusupe ake eno apughu ngo alupino qunhape ake. Atupe tipau putukhakeu ileiqiveno ake.

³²Ino tipau juapuzu ti kumsujuke tileno akukutsu lakhi hi ithiluke:

³³Ingua eno zualo, nono tishinishi aghiaye. Ou kumshope ado kitila ghenguno akulhoqhialo,

³⁴ikemu nono zuakelauye aquaghano aghunanu kupumi ghushimi toi olepuwuve nani.