Read Sumi Naga AHOLE 25 Bible Online

AHOLE 25 - Sumi Naga bible

AHOLE 25

¹Hipaqo ghi Solomon holetsake, hipaqoye Juda yeghilo Akukau Hezekiya kughakilo achekemino yekidephe keuke.

²Alhou no kiu kusupuani keno tipaqo ghenguno ninguno pa gihu cheni; ikemu tipaqo phujukeuno kukami jekipipue.

³Akukau lakhiye kiu kumsu ani keno noye khilemu ithimo nani, pa kukumsuye atsutsu kuchuqu toi momu azughi kuthotoi ningu launo pakutashi anike.

⁴Tsandiyi lono abaghu ikhivelo eno tipau peithache kemiye jukivipu thime mlapheluve nani.

⁵Akukutsu lhoksa tsuchekemiye akukau lau sawuvelo eno akukau yehpeka no kuchou xakutha shikeu kutamino ithiwove nani.

⁶Kughou nono akukau zulo puthughoni keno pa pelo no ithi peniaye akumo akukuhau lono noye akhotomi kepi pikevilo.

⁷Alakhu akiqheulo opelo ngopeniaye oku pekeuno olakhu pesu kutami akhotomi tsuvelopi pikeu nguno akiviuke.

⁸Nono kiuala ithuluke ghenguno paikhavino kughakutha alo wu kevilo. Thopimi kutami lakhino athiuno ighipuzu nono piakeuye achipi kumoke ipiaye noye kishive niye kya?

⁹Okisughumi ngo okujo dolo akukumsu kutuqu aghiaye okujo dolono tipau xathaluvelo eno tuqhou tsa kiumu ashou pipe kevilo.

¹⁰Tikumoaye timi kumtsuno noye tuqhou tsa pakutashi puavemla kenapi ithive nani eno noye akukujono xumlave nani.

¹¹Atsa aloqhiyi pive keuye shunayi pe tsandiyi shou ananu shipuku pua ketoi nani.

¹²Pujushijuve kemino ghutu keu tsa pesu ininishikemi tsukeuye shunano shikeu amekusho anguthi momu shuna aghileu pesu achila mla puakeu nguno akiviuke.

¹³Pukhukulu ghinikishimi lakhiye ghile tsala kululo azu kumko toi pa puwu akeu ghuthi puxu tsu cheni.

¹⁴Tsunipi piqhive no khilemu tsumokemiye tsutsughu sughimokeu khungkusu ngo amlhu hutoike.

¹⁵Kutuuno zuiza keuno tsatsayi mujochilekeu hephoqhilu nani eno ayehkipemi ghi putsaqhiluve nani.

¹⁶Nono avehupu shiakeu nguno alau khilemu akhingozu chukevilo; ihulo chuveaye mughuve kepu shive nani.

¹⁷Okisughumi chilo xujuwu kevilo; paye ojupe angaveno omithiuve nosake.

¹⁸Akimki lono okisughumi nguku keuye azuta, asuthalu momu apiji toi akithipuke.

¹⁹Avekusalo pukhubemla kemi mumube aye ahu nanaive keuno achuqupu tsalu ake toi momu apukhu kinitavekeu pusu ala checheke toike.

²⁰Amlo ghimemi lau alephepiye akeuye akumko tsalalo pa phimini ikhivetsuke toike momu azakulo amiti pesu nudatsuke toike.

²¹Oghumino muzuthi aghiaye pa kughulhulo, pano tughuthi aye, jelo.

²²Noye pa pelo akukujono pa pitiqhi anipeke eno AMPEU no asaxu otsu nani.

²³Ahuu mulhuno mutsuqheino tsutsughu sughicheke toi xikishino amlo kighide sughi cheni.

²⁴Mutomushu chekeu nipu sasu kumtsa kughuna kepuye aki sheqholo[2] xuakeumu pavike.

²⁵Ashekhashi, aghache yeghi lono kiyephi kithe chilu keuye tughuthi akelo azu kumko yelukeu toike.

²⁶Amikuchomi lakhino kixikilami zulo wovekeuye aniba zupuki toi momu puqovekeu zukikhe toike.

²⁷Akhingozu chilokeuye oghenguno alomoe, ike chilo sheqhekeu pukaputsa phukeuye tihutoike.

²⁸Alikhi aghasumla kemiye akuptu kuboleveno aphughi leluve ketoike.