Read Sumi Naga AHOLE 28 Bible Online

AHOLE 28 - Sumi Naga bible

AHOLE 28

¹Kixikilamiye timi khunomu pa hachemo namu msano pove cheni ikemu kuchou shi xuchekemiye abongushu toi amlo kumto shi acheni.

²Kughono shiyeh lakhino axine shini keno ayehkipemi kutomo ipeghive cheni. Ikemu kughono shiyeh lakhilo tsukhuyikemi eno kumsukulumi sakiphemi ani keno tiye mutotoi nani eno ado kushuwa tishi alucheni.

³Yehpekami lakhino kumlhomi nedaqoda keuye muqhumuza ghuighikelo axabo kutsave tsukeu toike.

⁴Nono ayezah phimo gihumo cheniaye noye kixikilami kudaumike; ikemu nono tipau ghokulu shicheniaye noye kixikilami ghumike.

⁵Alhoksamiye kuchou xakutha kiukela mthake, ikemu khunono AMPEU mlla cheni keno kuchou xakutha akivishi ithitoi ani.

⁶Kumlhomi shipuzu kuchou shikeuno kinimi shipuzu amikucho kumo lono xuchekeu nguno akiviue.

⁷Apumi khuuno ayezah peluni keno paye tsukhuyi ani. Khunono kiumu akivi kuhakemi sasu shompami shini keno paye papuh shiputha anie.

⁸Nono punakeu akighishe lucheni eno kutami shou adokivi luvecheni aye owu kinikuluye khunono kumlhomi kimiye kupu cheni keno tipano lau wuve nani.

⁹Nono ayezah peluchemo aye Alhou ye okighini initsunikeu ighono mithi kutu cheni.

¹⁰Nono kuchou shi xuchekemi muquqhipe alhoksa kumla shipe aye noye olikhi olichhelo ilulo nani. Kiumu pimimokemiye amheghi kije ithulu nani.

¹¹Kinimino panoqoye alokutsumi kepi pulhapuju kumsu cheni ikemu kumlhomi khuno ghushoghili vethalu ani keno pano akiviu shi ithiani.

¹²Kughono timi alokemino ayehkipe kukalo ani keno kumtsuno ahukulushi alovi cheni ikemu kughono alhoksamino ayehpeni keno timiye itshuwuve cheni.

¹³Nono oxine pekusu cheaye noye akuxulo khilemu tokulupu shimo nani. Tipaqo piphevelo eno phevelo tishiaye Alhou no oshou kimiye qhiyikeu anani.

¹⁴Pulhapujulo AMPEU gholulo eno noye alokivi shi nani, ikemu khunono amlo hekighike auveni keno kusakushopu sholu nani.

¹⁵Kumlhomiye kixikilami ayehkipemi shou kiumu shimlano auve cheni, paye abongushu yikusano ighakeshi momu ava ghugha toi acheni.

¹⁶Ayehkipemi lakhino vethakulu kuhakeloye paye ayikusashi nedaqoda chekemike. Khuuno amikucho kumo mithi cheni keno paye ado kushuwa ayehpe nani.

¹⁷Timi ghiqhikeu lono pimive kemiye pa likhi pa kumo kighithe chhu anike. Pa hakha kevilo.

¹⁸Kuchou shi xulo eno noye xapheluve nanike. Nono kuchou kumo lono xucheaye zuleno ikiqive nani.

¹⁹Aka aghashi mlachekemi alukichimiye pano chukepu kupukunoshi aghi cheni. Timi khunono adou lono ado pevecheni keno pulhapuju kumlhomi shi nani.

²⁰Kuchou shi xuchekemiye akuxulo kupukulai eno alokivi shi wulu nani. Ikemu nono paikhavino kinimi shive nishiaye oghime kepu sholu nani.

²¹Agijukeuye akivi kumoe. Ikemu kughakuthami khamiye kulugho luniaye akumou shicheni.

²²Alikhi asala phukemiye paikhavino kinimi shiveniaye kelono aquaghano pa shou ikughive niaye akeu ghi mthave cheni.

²³Kutami shikumzutsulo eno hithiuno pano kuhakugha shikeuye kichileu kena pi ithive nani.

²⁴Timi khuuno pa puaza launo pukalukeuye achipikumo kepi mtha keno paye kupkami kutami qhemike.

²⁵Alikhi asala phukeuye akupuna huthu cheni. AMPEU pukhukeuno oghenguno shishe akiviuke.

²⁶Olikhi okukumsu papekeuye mbomzuke. Alokutsumi kukutsu papekeuloye xapheluve kepu ani.

²⁷Kumlhomi tsulo eno noye khilemu kuhavekeu shimo nani. Nono kumlhomi ithulukelo onhethi miyiluve aye timi kutomono oghusho nani.

²⁸Alhoksami ipeghiveaye timino itshuluve cheni ikemu timi tipaqo ikiqive aye amikuchomi thuwu ipeghi puzu ayehpe cheni.