Read Sumi Naga AHOLE 29 Bible Online

AHOLE 29 - Sumi Naga bible

AHOLE 29

¹Oshikumzu tsukeu kumtsulo nono alaushi omlo hekighike auve aye ghulo lakhilo noye mukhumuno shive nani eno khilemu idethughi mlave nani.

²Amikuchomi yehkipemi ipiyelo eno alokivishi akemiqo ino opiyenike. Kixikilami yehkipemi ipiyelo eno amloksamiqo ino opiyenike.

³Nono alokutsu kupukimiye aghi aye opuhye ojupesu akijivilo nani. Kutuqhalimi launo pisa pevekeuye aghuzunikha shi kilheve keuke.

⁴Kughono akukauno achipiu xakutha ghenguno amlo suni keno ashiayehye mutotoi nani ikemu pano pisalo likhi amlo suauve aye paye pa ghakhu shipuhave nani.

⁵Nono oshou lau kuhakugha shi aye noye olikhi olichhe shipe qhianie.

⁶Alhoksamiye pano likhi pano xine lono meluve cheni, ikemu kuchou shi xukemiye alokivi eno pano lakhakepu kuhae.

⁷Timi kivimiye kumlhomi chipiu ithi cheni ikemu kixikilamiye tikithipu vethamlae.

⁸Khunono kutami phimo gihumo cheni keno aphughi kumtsu xukubavetsu cheni. Khunono alokutsumi keno iquneikeu sughi cheni.

⁹Kughono tsukhuyi kemino kughuzumi lakhi shou xakutha sughini keno kughuzumi huye aloghu ideno nuwuve cheni eno inapugha tsa zale cheni.

¹⁰Ajih pele chekemiye kucho shi xuchekemi jumithi cheni ikemu amikuchomiye titoikeu kuxu susho cheni.

¹¹Mbomzumino pano mlo kighide ashou pephe cheni ikemu kuptomi ye iqunei cheni eno amlo kighide suchileluve cheni.

¹²Ayehkipemi lakhino akimki sutsalo amlo tsuqhiyi che aye pa qholo kijemi kumtsu kimkimi shiukhave nani.

¹³Kumlhomi ngo nedaqoda kemi kinikujo hino aphiphike AMPEU no pama kinikujo anhethi tsupe puani.

¹⁴Kukami lakhino kumlhomi chipiu sushotsu aye paye ado kushuwa ayehpeche nani.

¹⁵Shikumzukeu ngo ghasukeuye ititunu ghenguno aloke. Atianuli lakhino pa likhi pa gho shiuve aye paye paza shikukujo anie.

¹⁶Kughou alhoksamino akuka peni keno hekiqhi bukiqhi kighishe cheni ikemu amikuchomiye xuwo tipaqo ikiqive keu ithulu nani.

¹⁷Onu ghasulo eno noye pulhapuju pajupe akijivilo nani. Paye oshikukujo kepu akiqi kiumu kuha nani.

¹⁸Shiyeh lakhiye Alhou no kichepiyemo keloye kithikiyimo keu shiyeh shi nani. Khunono Alhou yezah pelu cheni keno pano kumghapue!

¹⁹Nono aqemi lakhi vilo atsa likhi pi aye pa shikumzuluni chemoe. Paye otsa vethaluvi ikemu paye amlo tsuqhiyi shitsumo nani.

²⁰Khunono kumsu kutojumono papashi piqhive cheni keno anikhami lajupu pachi anie.

²¹Aqeuno itimi shiaphi lono pano lunishikeu thwokha pa tsu che aye ghulo lakhiye nono pighiakeu kumtsu pano luve nani.

²²Khunono paikhavino axuideve cheni keno mutomushu keu ngo akupuna huthu cheni.

²³Qhezalaki keuno osunheqhive nani ikemu nono akumtsha kughuvu shiaye ogihu nani.

²⁴Kupkami kusami shikeuye pa likhi pa ghumike. Pano kughakutha alo kuchou tsa piaye pa ghimeqhi kepu shive nani eno pano kuchou pimoaye Alhou no pa ghushove nani.

²⁵Kutamiye ojupe kiu kumsu ani kelapi omlo susushi keuye akuighupuke ikemu nono AMPEU pukhu aye oxaphelu nani.

²⁶Timi kumtsuno ayehkipeu sasu akivishi kighithikile anishi cheni ikemu AMPEU lau likhino kuchou xakutha phulu cheni.

²⁷Amikuchomiye kixikilami jumithi cheni eno kixikilamino amikuchomi jumithi cheni.