Read Sumi Naga AHOLE 7 Bible Online

AHOLE 7 - Sumi Naga bible

AHOLE 7

¹Inu, ino kiu pikeno kumsupulo eno ino ovilo shilo pikeu khilemu kumsuma kevilo.

²Ino ovilo kiu pikeno tipau shilo eno noye xulu nani. Onhethi sushope qhiketoi ino shika keu kutokupui papelo.

³Ino oshikapiye keu ado kumtsulo pechelo; omlolo yekupulo.

⁴Alokutsu pesu ochepu toi peithalo eno jupilikulu hu oshou kuchou toi peithalo.

⁵Tipaqono kutami nipu launo eno totimino omusuluveni keu tsa pikeu lono noye putosuluve nani.

⁶Ghuthu lakhi niye iki lashe lono jupipe ake,

⁷tilehi lhothemi puju shijumo kemi kutomo ithulu eno tipaqo gholo akhotono mbomzumi apumi lakhi pa kutashi ithulu.

⁸Paye alaghila chekulo totimi lakhi achekeu kupunulo cheche. Pano li ki kupunulo vechesu wuche,

⁹tiye avelau zumoyive kethiunoke.

¹⁰Tileno lino pa sasu kusho; liye kutuqhalimi lakhi phimini toi pepu eno kuto kughoi ake.

¹¹Liye ighumokemi, kujomokemi eno pulhapuju alaghilo iqhoiqiche.

¹²Khaniloye alaghilalo, khaniloye alhikishialo momu ala vekugholo ngo khe cheni.

¹³Lino li u sukhopesu apumi hu valuve, pa muma, pa nhethi lo thebei juno pi,

¹⁴“Niye ishitsalalo aghakishi kumllagho tsukeu lono ashi suwo puanie.

¹⁵Ike niye ophuwuniye khalau ipeghi anike hi kusholuvae!

¹⁶Niye Ijip yeghi lono sughikeu phepheyikeu phi lo ayeshisukeu pesu izua qhape puani.

¹⁷Ino tsungquikeu jeli eno akusaxo pesu tipau vekutsungu puanike.

¹⁸Ighilo! Nikujo puthotsu ashi-aji pulou shiani nolo. Nikujo kukhape alokivi shinike.

¹⁹Ikimiye akilo kuhake paye ala kushuwalo izuwuvae.

²⁰Paye pisa kutomo pa gholo pewuvea eno apine do kini dolo ideighini chemoe.”

²¹Ike lino zuiza keu tsano apumi hu musuluve.

²²Amshitsu ghikiqhi lalo sawu chekeshi paye paikhavino li sasu wuche, alichhe shipuakeulo asheno ka-ka ilhe ilo ketoi,

²³tilehi ashuno pa mlo jiphovetsu nikeu akeghi. Apumi tipauye aghau lakhino akhamelo ilolu aketoi pa kuxuye akuighupulo ani kepi paye mthake.

²⁴Tishiaye anuliqo itehi itsa inilo. Ino kiu pikeno tsaqui amlo tsulo.

²⁵Totimi tikithipu pelo nongu zusawuve pekevilo; li papesu itsuwu kevilo.

²⁶Lino timi kutomo kuxu shipusavetsue eno timi kihikha kumla pithive kepu shike.

²⁷Nonguno li kilo wuaye kithimi yeghi laghilo wucheake. Tiye akithipu shokuthalake.