Read Sumi Naga YETSAPIU 10 Bible Online

YETSAPIU 10 - Sumi Naga bible

YETSAPIU 10

¹Amiyi kithino tsungquikeu bohu akuchopu muna shushuyi veputsu cheni tihutoi anikha kitilano alokutsu kije puhavetsu kepu shive cheni.

²Alhoaye lono alokutsumi lakhiye thime achipiu shi cheni eno mbomuzumi lakhiye achipikumou shichenike.

³Mbomzumiye alalo inami sholukelo ghi pa nikha pephepiye cheni; kumtsu pelo paye mbomzumi lakhi kepi ithipe cheni.

⁴Oshou ayehkipeuno oshou amlo ide aye oje kanikeu kaku pewo tsukevilo; nono iquneive aye shishe pimipe puaghikeu namu okipimi qhivetsu kepu shive nani.

⁵Amikucho kumo lakhi ayeghi hipaulo ino ithulupua keu hi ani, tiye ayehkipemino amikuchokumo shichekeu lakhi.

⁶Mbomzumi pelo ayehkipe alo ngope nike tsu ikemu kinimiye kihi movekeu.

⁷Aquaxemino khurshi shou ikupuzu kijemi pelo aquaxemi toi apukhuno chesu wukeu ino ithulu puani.

⁸Nono aqoh chhuaye noye tipaulo ikiqi ilo cheni; nono putupuakeu vexu iloaye apighino omighi cheni.

⁹Nono atu chhukeu-alo mla cheni aye atuno oghuza cheni. Nono asu shokho aye tishi ake lono izalu cheni.

¹⁰Omughuye kokoi eno nono tipau chighimo aye noye tipau peitha kelo akashi mlakepu shi nani. Azuuno kughukeuno akukumsu kuauke.

¹¹Apighi paghino omighivepe aye kishino apighi zuluveni keno tipau muqu akeu avehupu kuhae.

¹²Alokutsumi lakhino piqhi keuhuno gihu kepu pa lau sughilu cheni ikemu mbomzumiye pa tsano pa kutsave cheni.

¹³Paye inapugha tsa pesu pithu puzu anikha lono kishekha cheni.

¹⁴Mbomzumiye atsa pi-pi acheni. Hipashelo kiu shini cheni keno timi khunomu mthae eno ninguno thive kethiu kiu shiveni keno khunomu ningu vilo pimlae.

¹⁵Izuphokicheyi kemiye akumla mla taveno wovekeyeh mthano akilo womono aghimeshi mla auve cheni.

¹⁶Aghakhu lakhilo akukau huye lhothemi eno tipaulo sakiphemino puthotsu kughulhu kile auve aye tipau yeghiye akupunalo auve cheni.

¹⁷Ikemu akukauno pa likhi pawu xakutha shilu eno sakiphemino ado achipi lono chu-sho eno shomzumo puzu pano likhi panoqo ghasuluaye tipa yeghiye kumghapuke.

¹⁸Kughou timi lakhino pa kilo ayikhu qhussu pichi auve ni keno azu poiloghino aki tipau ye ilaiqive nani.

¹⁹Kuchukusho shikeuno olopivi cheni eno ajino ohu pitetsu cheni, ikemu pisa kuhakeloye hikuma lakhimu shi mlake.

²⁰Mukhano pimu akukau pipusa kevilo eno nolikhi nozuabolo pinamu kinimi pipusa kevilo. Aghauno asutsa pewuveno nono pivekeu panoqo tove nosake.