Read Sumi Naga YETSAPIU 2 Bible Online

YETSAPIU 2 - Sumi Naga bible

YETSAPIU 2

¹Ino ilikhi ivilo ishipi, “Alokiviye kiu keno ino tipau phujuno aloino ngoni cheni.” Ikemu highi adou kepi ino phulue.

²Ino phuphelukeuno kunuvuqai keuye anikha eno alokivi jeliye kiumu akivipu kuhae.

³Ino alokutsu minechekeuno ihakilhe ilikhi ilopiviniaye aji shonikeu shiju eno ado kivi aluni keu shijuke. Timiqoye ayeghilo ikhonheyi xuakelo hitoi keu gholauno xukeu pavi kepi ino kumsue.

⁴Ino akumla kije shipe qhilue. Ino isala aki kuloghi shipe qhi eno atsayilu ghi chipe qhie.

⁵Ino aghutu ngo axathili shino tipaqolo thwokha xathibo shosue;

⁶ino tipaqolo azu sukepushi ayizu chhupe qhi.

⁷Ino aqu-axemi kutomo qhu eno iki lono punukemi aqu-axemi ake. Jerusalem lo achekemi gholo khumu ijehi atsu-aqu pighikemi kuhake.

⁸Ino shunayi ngo tsandiyi pekutsupe qhi eno ino ka chekeu bocholo kukamiqo kini khuki kumtsu ino hekutsupe qhiluvecheke. Kiptimi ngo totimi alephe iloshipivitsu penikemi ache eno ino lunishike thaqhu anipu amishimi kumzapu puacheke.

⁹Iye, Jerusalem lo xuchekemi khunomu inguno akijeu kuhae, niye kijeke eno ilokutsuye khilemu iqhivemoke.

¹⁰Kiukiumu ino lunishikeu ino ithulue. Ilopivi kepu jeli lakhimu milivemoe. Ino kiu mla chekeno tipaqo shou ikijivilo cheke eno hipaqo kumtsu isaxuke.

¹¹Tileno ino khijejehi mlalu eno tipaqo mlaniaye niye kishi akaveshi shiche keno ino kumsukutoju, tipaqo kumtsu kiumu kuhae. Hiye adou kethono kiumu kuhae, amlhu kughahaju ketoike.

¹²Hipaqo kumtsu shipuaghi namu, kukami lakhiye azuu kukamino kiu shipuani keno tipaphi likhi shilu anike. Ike ino alokutsu momu anikha eno izuphokiche keuye kiu kela tsaqui phukuthoju nikeu shie.

¹³O ino ithi ani, “Ike akuvuye zumoikeu nguno akiviu ketoi alokutsuye anikha nguno akiviuke.

¹⁴Alokutsumiye khilau wucheni keno ithi ani ikemu anikhamiye tishimlae.” Ikemu shekhalo kiu shive chenikeno ningu kumtsuno ithi anike.

¹⁵Tileno ino ilikhi ishi iputsa, “Ashekhaloye anikhami gholo aphiphishi imeve nani, ike ino alokutsu shiakeuno kiu alau shiluni cheni kya?” “Kiumu kuhae, adouke” ipi ilikhi ikhochile.

¹⁶Khunomu alokutsumi na anikhami pinamu kumsuchilelu chemoe. Ighinikeu tsalaloye ningu kumtsu kumsuma khave nani. Alokutsumi na anikhami namu ningu kumtsu thive nani.

¹⁷Tighenguno akuxuye kiumu akiqipu kuhae kughengu ikuxulo kiumu sughi tsumoe ikemu akupuna likhike. Hi kumtsu adouke; hiye amlhu kughaju puhake toike.

¹⁸Ino mlachekeu eno qepe qhichekeu kiunomu ighenguno akiqipu lakhimu shitsumlae kughengu ino ithikeuno niye tipaqo pesu ishelo ighinikemi qhivetsu kepu shini cheni ke;

¹⁹eno khuno ithi ani kya? Paye alokutsumi shiaghiluvi momu anikhami shiaghiluvike. Ikeghi ino mlaqhikeu kumtsu eno ayeghi hipaulo ilokutsuno ipelo qelupekeu thwokha pawu shive nanike. Hi kumtsu adouke.

²⁰Tighenguno niye kushiniaye ighono ime mla chekela pi imloksa shi ani.

²¹Kughengu khaniloye timiye alokutsu ngo akighithi eno asuqekithi peithano ime mlachekeu kumtsu qhivetsuno tipaqo ghenguno ime mlamo kemi pelo alokughunoshi peithawuvepe cheni. Hiye adouke eno hiye achipi kumoe!

²²Akuxu kupujulo timiye aghime shi mla cheni eno tiye kiu melono tishi ime acheni kya?

²³Nono xuake kupujulo nono shikeu kumtsu kumu kuhae ikemu amlo kusa eno amlo ghujupu likhike. Putholo thotsu okukumsu akulho qhimlae. Hi kumtsu adouke.

²⁴Timi lakhino thwokha kumtsu nguno akiviu shikepu shi akeuye pano kiu qelu keno chu-shono alokughuno shiakepue. Tishikeu ghi, ino ithilu keuno highi Alhou launo ighi cheni.

²⁵Pa launo kumoaye noye chukepu kiu ani kya? Momu khuno alokughuno shikulupu kya?

²⁶Alhou no alokutsu, akighithi eno alokiqi pesu pa pulou shichekemi tsucheni ikemu pano axinemi pelo qeluno pekikelu chenipe tishianguno panoqono aghikeu pesu pa pulou shichekemi tsu niyeke.Hi kumtsu adouke. Hiye amlhu kugha ju puha ake paphike.