Read Sumi Naga YETSAPIU 4 Bible Online

YETSAPIU 4 - Sumi Naga bible

YETSAPIU 4

¹Itaghi ayeghiqhalo qoda kilekeu kumtsu ino ithulu acheni.Nedaqodape akeqo nhezu kipijilo khunomu panoqo lokughuno tsulu chemoe. Khunomu panoqo xaqhe chemoe kughengu panoqo nedaqoda akemino akuka pe acheni.

²Niye thive hauve kemi mine acheni; kughengu panonguye kuxumi nguno akiviu shiauvae.

³Ikemu hikuma nguno akiviuno punumove keqou pavike, panonguye ayeghiqhalo alhoksa kumla ithulupe chemoke.

⁴Itaghi ino ithulukeuno timino tokulu shiniaye aghime eno aka aveshi mlacheni, tiye pano kisughumi juminekeu ghengunoke. Ikemu hiye adouke. Hiye amlhu kughahaju puhakeu paphi ke.

⁵Panonguno pichekeuno mubomzumi ye pa-u kumsho pesu acheni eno akhuava lono thive cheni.

⁶Timu tishi aghiluvi, ikemu kitila aghikeu pesu amlo iqunei akeuno a-u putoputo gha aghime shi amlhu kugha haju puha akeu nguno akiviuke.

⁷Kutau kiukela ithulu puani eno akuxulo tiye adouke.

⁸Timi lakhiye pa likhi acheni, paye anu mu athikuzumi mu kuhae ikeghi pulhapuju ime mla acheni eno pa kinikululo aghakiqi khilemu kuhae. Paye khuu ghenguno tishi ime mla acheni eno pa likhi pa lokughuno shi nikeu miliveno acheni kya? Highi adouke eno xuakelo akijikusa pu lakhie.

⁹Kiniye lakhi nguno akiviuke, kughengu pamaye kumtsa mla kuqhakeu lono akivipu shilu cheni.

¹⁰Pama lakhino ikiqiveni kelo lakhiuno pa sunhe pukulu nani. Ikemu lakhi likhi ake lono ikiqive aye tiye avekusa kuchou shiniake kughengu pa sunhe pukuni kemi tilehi kuhave nani.

¹¹Mukomghai aye, mikini kumtsa zukeuno luvuyilu cheni, ikemu milakhi likhiye kishi puzu luvuyiluni kya?

¹²Timi kinino lakhi sasu kumjokelo mikinino lakhi likhikeu shou theqhiluve cheni. Akighi ala kuthu pilikuqhakeuye suthalunikeu shove cheni.

¹³Timi lakhiye kumlhomi kuxu lono ipeghi puzu pano yeghilo akukau shiluvi momu akughu shi acheno akuka lakhulo ikuluvi, ikemu pano kitemi shivekelo akukutsu tsa lunikeulo anikha shive aye paye lhothemi lakhino kumlhomi shiamu alokutsushi akeu pavie.

¹⁵Ino ayeghiqha hipaulo akemi kumsuju acheni ike ino ithi akeuno timi hipaqo gholo apumi lakhino akukau alo ikuluve luvi.

¹⁶Akukauye timi kihi khamla kepu shou ayehpe aghiluvi, ikemu kughono pano cheveni keno pano mlaqhi puatsukeu ghenguno milakhi nomu pa shikimthi chemoe. Hiye adouke. Hiye amlhu kughaju puhakeu toike.