Read Sumi Naga YETSAPIU 5 Bible Online

YETSAPIU 5 - Sumi Naga bible

YETSAPIU 5

¹Achinekilo wunikeulo kutokupui shilo. Tipa-alo shika luniye wukeuno aghashi pesu mllakeu nguno akiviuke, kughengu anikhami khunono kiviksa mthakeno tipaqono ti shichenike.

²Nono pimphi lono kumsuju paghilo eno kumsulukhavi Alhou vilo piqhi kevilo. Paye kungughalo ani eno noye ayeghilo ani ikehu pikepushi akeu likhi pini thono tinguno alauye pikevilo.

³Nono khijehi omlo kutakihi ani keno tijehi noye asamo kusa pumo nanike eno khijehi piani keno tijejehi anikha tsa piauve nanike.

⁴Ike nono Alhou lau tsuni keushi piqhikeulo tipau pelu nike papashi tsulo, paye anikhami shou amlo kiqi kuhae. Nono kiu tsuniepi piqhivekeno tipau shilo.

⁵Piqhiveno tipau shimoveni keuye khilemu piqhi move keuno akiviuke.

⁶Olikhi otsano opelo axinelo sailovepe keu shikevilo eno hithiuno Alhou chinemi vilo nono pimivekeu pikepu shikevilo. Kushiye Alhou pelo oshou axuide apeni kya? Kushiye nono mla puakeulo Alhou pelo kutsapiniyive apeni kya?

⁷Nono khijejehi asamo pumo aghina, khijejehi adou kumla nono shiaghi pina momu khijejehi atsa zale aghinamu noye Alhou sumsa moaye sake.

⁸Kughou yehpekano kumlhomi nedaqoda veno kuchou xakutha ngo achipiu shitsumo nikeno tipau jupe akumzaqhiyi kevilo. Kijemi kumtsu panoqo nguno akijeuno shokha pesu acheni eno pama shou itaghi akijeu no sushope aphike.

⁹Kukami ghi ghile hukeu shou bepe acheni.

¹⁰Nono pisa mine cheni aye noye khilemu aghaqimo nanike; nono kinimi shinishi kutu cheni aye noye khilemu lunishike thaqhu kumtsu ithumla nanike. Hiye adouke.

¹¹Nono khijehi kinimi keno tijejehi chunikemi kutomo auve cheni. Nono ala shilu akeuye noye kinimi lakhi kepi ithi keu likhike.

¹²Akumla kishimi lakhiye pano chukumkha aghiluvi momu chuzulakeu shi aghiluvi ikemu paye putholo akivishi zuhulu cheni. Kinimi lakhiye kupukuno shi ani kemu pa mlo kutakihi kelauno zuhumlano auve cheni.

¹³Ayeghi hipaulo alhoksa kutu akeu ino ithulu acheni. Ado kitila ghenguno timino pano vehupu shiniaye pisa kikepe puacheni,

¹⁴tiye lhidi ngukusa lono puwoveno pa tianuli qhitsu kepu kiumu kuhave cheni.

¹⁵Aza polono paye kishi ighi keno titoi itaghi aphi kumsa idewove cheni; kumsa ighike toi paye ime mlachekeu lono kiumu pemono a-u kumsa wove cheni.

¹⁶Highi ighono achipi kumokeu lakhike, ninguno kiutoi ighikeno titoi idewove cheni. Ninguno ichhe ime amlhu kughaju puhake toi kiu ala shilu cheni kya?

¹⁷Ninguno zumoikeu, amlo ghime, amlo kutakihi, amlo kighide eno kusukini lono xu acheni.

¹⁸Ino kiu phulukeno tiye hike; Thime kumtsu nguno akiviu timino shi akepushi akeuye Alhou no akuxu ikhonhei pa tsukeulo pano kiu mlalukeno tipau chu-sho no alopivi akepue; hino timi sajeke.

¹⁹Alhou no kinikulu ngo tinhemgha tsuno pa pelo tipaqo peitha lupe aye paye shikimthitsu akepue eno pano mlalukeu pesu alovi akepue. Hiye Alhou launo ighikeu gho lakhike.

²⁰Alhou no pa pelo alokivishilu peke, akuxu kughukho ghili kumsupe amlo kutakihi keu chilomo nani.