Read Sumi Naga YETSAPIU 6 Bible Online

YETSAPIU 6 - Sumi Naga bible

YETSAPIU 6

¹Ayeghiqha hipaulo kuchou xakutha shichemokeu ithulu acheni.

²Alhou no kuakini, agigihupu ngo tinhemgha pesu timi khami tsu cheni, iye, pano lunishi akeu jeli kumtsu tsucheni, ikemu Alhou no timi tipau pelo tipaqo peitha pemove cheni eno tusumi pelo tipaqo peithaluvepe cheni. Hiye adouke eno vimo kutuke.

³Timi lakhino anuli 100 kutolo aghiluvi eno axushu aghi namu pa kuxulo alokivi thime peithamla eno akivishi pa sukumo shiqholu kepu shimo aye, ino pinikeuye anga akithi shi ghi punu keu no pa nguno akiviuke.

⁴Anga tipauye punuqhi akeu adouke eno tiye akuzu lo hailove cheni, eno tilauno qhoi kumsumave cheni.

⁵Tiye atsala kuvu khilemu ithulu chemoe momu akuxuye kiu toikeno ithi chemoe, ikemu timi tipau nguno alau tiye akulho likhimu qhilu cheni ke.

⁶Tishiaye timino ampe 2000 kutolo xukepu shi namu akuxulo alokepu shilumo aye ti pama kinikujo a-a aphiphilo wuve anike kumokesha?

⁷Timi lakhino akumla shichekeuye chukepu hami ithulu niyeke, ikemu paye khilemu lukumkhashi chemoe.

⁸Alokutsumiye kiutoi anikhami nguno akiviu kya? Kumlhomi lakhiye akuxulo kishi xukepu keno ithikeu likhino pa kivipu kiu shiluni kya?

⁹Hiye adouke, hiye amlhu kughaju puhakeu paphike. Nono kiu ani keno tipaulo aghakiqhishi akeuno kutau kiuala lunishikeu nguno akiviuke.

¹⁰Kiushi ipeghi ani keno ti kumtsu kha-ghino tishi peniye kutovekeuke eno ningu kumtsuno ithi anike timiye panguno akumtou kutami sasu kutsala mlake.

¹¹Atsa khije alau pikeno tijehi adouke eno noye kiumu akiviuke kumoe.

¹²Ikhonheikeu eno adou kuxu, yekukhu ighikeu lakhi toikeu kuxu hipaulo timi lakhi ghenguno kiuno akiviu keno khuuno kishi puzu ithini kya? Kughengu timino thive kethiu ayeghiqhalo kiu shinani keno khuuno kishi puzu ithini kya?