Read Sumi Naga YETSAPIU 8 Bible Online

YETSAPIU 8 - Sumi Naga bible

YETSAPIU 8

¹Alokutsumi likhino thimeye kiu keno kuchouno tipau kiqi pitsu cheni. Alokutsuno pa pelo agi vuqailu pe eno pagi sukughukeu shipuha tsu cheni.

²Akukauno pikeu shilo eno Alhou vilo lhelheshi tushoqhi kevilo.

³Akukauye pano shinishikeu kiukiumu shivelu nanike, ike pa gizu lono chevelo; akuighupu-a tikithipulo ngo akevilo.

⁴Akukauye akuka gha pesu mlaitha cheni eno pano kiu shikeno khunomu mujochile mlae.

⁵Pano ahza tsukeu nono aghokulu shiake kutolo oghenguno xakulupu ani eno alokutsumiye kughono kiu kishi shikepu keno ithi acheni.

⁶Kiu kiumu ado eno aghola achipiu lono thwokha kumtsu shikepu acheni, ikemu ninguye kitila likhi ithianike!

⁷Ningu gholo khunomu kiu shive nani kela ithi chemoe eno ningu vilo pitsu nikeu khumu kuhae.

⁸Timi khumu thimove kepushi pa nguagha hakhamlae momu pa kithi tsala tukiqeve mlae. Tipau ghukishi lono ninguye po mlake; ninguye pishiqhiveno nila phusu wuve mlake.

⁹Ayeghiqha hipaulo thwokha thime shiakeu ino kumsuju akelono ino hipaqo kumtsu ithuluke, ayeghiqhalo timi khamino akuka pepuzu kutami pelo panoqo qholo ichhe ime chenipe.

¹⁰Tipashelo kixikilami kumo qhoveno akumo kilivelo auve keu ino ithuluke, ikemu akumokilive lono wochekelo timino panono alhoksa kumla shichekeu phughilo pano sheqheke. Highi adouke.

¹¹Kushiye timino papashi heqhi buqhi cheni kya? Kughengu heqhi buqhi puaghikeulo mutazu shikighime keu kuhake.

¹²Axinemi lakhiye ghuthu 100 kutolo heqhi buqhi puaghiluvi tishimu xu aghiluvike. Iyei, panonguno kiu picheni keno ino ithi ani: “Nono Alhou gholu aye thwokha achipi shi nani,

¹³ikemu kixikilami ghenguye alokepu shimo nani. Panoqo kuxuye yekukhu lakhi toike eno panoqoye lhothemi shi aphi lono thive nani, kughengu panonguno Alhou gholumoke.”

¹⁴Ikemu tiye adou tsake. Ayeghiqhalo kiu shiani keno julo: ado khaniloye amikuchomiye kixikilamino ghimeqhi cheni eno kixikilamino amikuchomi saxu ithulu cheni. Ino piani, highi adouke.

¹⁵Ike timiye pa lopivi kepushi akepu ino ithilu auvae, kughengu hipa kuxulo pa ghenguno aghakiqipu hilikhi ani tiye chu shono pa likhi pa lopivi anikeu Alhou no ayeghi hipaulo akuxu pa tsu puakeu ghulokilo pano ichhe ime mla akeulo hilikhimu shi kepushi anike.

¹⁶Kugho kughomu ayeghi hipaulo kiu shiani keno ithinike eno alokutsu shinike ino pukaputsa kelo, ino shijukeu kiqilo noye putho pucho idaithu ngo akepu shiauve cheni

¹⁷eno tishi ke ghi Alhou no kiu shiani keno khilemu ithiwo tolu chemoe. Nono kiu papu shi pukaputsa namu noye khilemu phupheluni chemoe. Alokutsumino panono ithivea kepi piaghiluvi ikemu panonguye tishimla aphie.