Read Sumi Naga YETSAPIU 9 Bible Online

YETSAPIU 9 - Sumi Naga bible

YETSAPIU 9

¹Ino ado kushuwa hipaqo kumtsu kumsukutoju eno ithulu puakeuno Alhou no alokutsumi ngo amikuchomi kumla kughutha peitha acheni, panonguno kimiyechekeu ngo mithi chekeu kutolo paulo acheni. Timi khunomu pa zu-u kiu ani keno kiumu ithichemoe.

²Tipaulo kutuqukeu kiumu kuhae. Amikuchomi ngo kixikilami, kivimi ngo alomokemi, achineyehlo amlo tsukemi ngo tipaulo amlo tsumokemi, aghashi pe mllachekemi ngo tishi chemokemi lau kiu shivepeniye kutopuani keno tipau aphiphishi ighi cheni. Kivimi lakhiye axinemi lakhi nguno akiviuke kumoe; ashoqhi shichekemi lakhiye tishi chemokemi lakhi nguno akiviuke kumoe.

³Kiu shivepeniye kutopuani keno tipauno kumtsu lau aphiphishi ighi cheni, hiye ayeghilo vimokeu kiu shiani keno tihutoi highi vimokeu lakhike. Timino xuake thaqhulo panoqo kukumsuye alhoksa eno anikhano chhitoi ani eno panonguye zuleno thive cheni.

⁴Ikemu timi khuu khumu kuxumi yeghi hipaulo xuakemiye lajupu hami acheni; atsu xuakeu huye abongushu thivekeu nguno akiviuke.

⁵Iyei, kuxumino panonguye thive nani kepi ithiani ikemu kithimiye kiumu ithiamoe. Panonguye asaxu kutau kuhake; kutamino panongu kumsumave cheni.

⁶Panongu kikimiye, panonguno jumithi chekeu, panongu lolo aghikumtho kumtsu panoqo gholono thive cheni. Panonguye ayeghi hipaulo kiu shiani keno khilemu tipau alo chhosulumoake.

⁷Wupuzu oghakiqishi ochuqupu chualo; oji shoalo olo pivilo, Alhou ye thwokha kumtsu lo achipishi anike.

⁸Pulhapuju alokivishi eno alovi akeushi ithulu pelo.

⁹Alhou no ayeghi hipaulo adou kuxu otsupuakeu xuake thaqhulo totimi nono kimiyechekeu sasu alokivi kuxu xulo. Ti adou tsala kumtsu aghakiqi shialo, kughengu owu shiluksa ghenguno noye tipau likhi ithulu nanike.

¹⁰Kiu kiu namu nono mlakeulo shishe mlalo, kughengu kithimi yeghiloye mla itha keu kuha, kumsukeu kuha, akighithi kuha, alokutsu kuhake eno noye tilehi wuchenike.

¹¹Avehu kutau ino phupe puani, ike ayeghi hipaulo muthuthei pothikemiye pulhapuju tokulu shilu chemoe eno amlo kuloghimiye pulhapujulo aghukishilo tokulu shi chemoe. Alokutsumi qoye pulhapujulo xulu chemoe, be-lhochu achemoe, aqho kutsughamiye pulhapujulo kinimi shiluchemoe, eno phui thaikemiye pulhapujulo akuxu kuchuqulo ikulu chemoe. Angukusano kumtsu lau ighi cheni.

¹²Kughono odo oghuloki ighi nani keno noye khilemu ithimo nani. Alichhe lono paikhavi no aghau meluveke toi eno akhamelo akha meluveke toi, nino kumsumo mitheno ake lono ado lhoksa lono ningu meluve cheni.

¹³Kiukela kutau ghi ino ithulupe puani, ayeghi hipaulo alokutsuye kishi achenikeno tipau kichekipiye kivi lakhi.

¹⁴Ghuthu lakhi taun aghulo lakhilo timi kutomo kuhano ache. Kukami akumto lakhino tipau taun le-ighi. Pano tipau bothaluve eno taun bokutha hepho iloniye kutove.

¹⁵Timi kumlhomi lakhi tile ache eno pano tipau taun xaphelu kepushike, ikemu timi khumu pa phimono acheke.

¹⁶Ino pulhapuju piache keuno alokutsuno akumto nguno akiviuke, ikemu timi khunomu kumlhomi lakhiye alokutsu kepi kumsulumoe momu pano kiu pikeno tipaulo amlo tsuchemoe.

¹⁷Ayehkipemi lakhi no kughuzumi hoholo asheshu akeu tsa inini kepuye alokutsumi lakhino iqunei shino piakeu tsa inikeu pavike.

¹⁸Alokutsu no aghunanu nguno alau akivipu shicheni, ikemu axinemi lakhino akivipu kutomo shipusave chenike.