Read Sumi Naga ALE KIMCHI 2 Bible Online

ALE KIMCHI 2 - Sumi Naga bible

ALE KIMCHI 2

¹Niye Sharon lo xamunuke, akhilalo lapu kupuke.

²Lapu-kupuno asahuli gholo akeshi Ilomi ye totimi gholo lakhi.

³Aghasubo gholo pukhothibo lakhi aketoi ilomiye lhothemi gholo lakhi. Ino alokiqhishi pa kicheqholo iqa eno tipau xathi michejukelo ngoyini.

⁴Pano isasu aghulhu shiakeu kilowu eno pakikimiye mchiphi ishou peqhe.

⁵Atsayithi kipiki pesu ighuthi puxutsu, pukhothi pesu ilopiqitsu; niye kikimiye kusuno suauvae.

⁶Pa u piyiu pesu ikutsu mukhutsu eno pa u-ajeu pesu ivape.

⁷O Jerusalem lo totimiqo, ivilo piqhivelo, Ashe ngo achuyi jeku puzu nonguye nino kimiye kile akeu vexatsu mokepi tushoqhilo.

⁸Niye ilomi sutsa chilu ani, Pano naghuto shou ilhesusu pocheni, atoqo ikachesu ilau cheni.

⁹Ilomiye achuyi toike, momu aqhu alhothe toike. Paye niki jibo phivilo puthugho, alashe lono alou jupulo eno ghokuna kedo lono pishipulo ju.

¹⁰Ilomino iputsa eno ivilo pi. Ithulo ilomi, ighilo ilomi, ino kupuchekeu, igholo ighivelo.

¹¹Susutsala wovae; tsutsughu tavae;

¹²aluzalo axamunu pu ipeghi ani. Alephe do ye ighivae; eno aluzalo miqhedu le chilu ani.

¹³Khughuthi ni-ipeghi ayeake; atsayi kuppu xono tsungqui ani. Ithulo ilomi,ino kupuchekeu, igholo ighivelo.

¹⁴Noye atu nhepholo itshuchekeu miqhedu toike. Ipelo ogi julu pelo eno olekiphe iniju pelo.

¹⁵Ni tsayiboqo puayeake tipaqo shipsa mphi lono tungtughaqo kughape ni tsuvelo.

¹⁶Ilomiye iwuke eno niye pawuke. Pano lapu xamunulilo pa tsu-aqu qo achu kumzake.

¹⁷Ilomi, tsuthomphi eno akuzu hamphi lono aqhu momu Bether naghuto nepholo achuyi lhothe lakhi toi nilau ide ighivelo.