Read Sumi Naga ALE KIMCHI 5 Bible Online

ALE KIMCHI 5 - Sumi Naga bible

ALE KIMCHI 5

¹Imlokuchuu, iwu kulaliu, niye ighutulo iloghiluvae. Niye vekuju mukhu ngo musughuta pekutsu ani; niye akhingozu ngo akhi kutsu chu ani. Niye atsayiji ngo akichhizu ye ani! Akusamiqo, kikimiye shomzumoke kutolo chu-sho alo!

²Niye zuake, ikemu imloye zuida ake. Ilomino ahukikhalo kukhukeu ino pumolu. Ilomio, imlo kuchuuo, iwu miqheduo, ikhaqhi sulo. Ikutsuye atsuzuno dadayi ani, eno putholo tsuzuno isa chechei pesu ani.

³Niye aphimini pepu amovae; niye khuno itaghi aphimini pepu kithe ani kya? Niye apukhu qhuvae; niye khuno itaghi ayeghilo nepuku ani kya?

⁴Ilomino ahukikha lo pau inapuku, ikelo imlono kuku shive.

⁵Ino ithuno ilomi khaqhi sunike musughuta i-ulo pe eno axo kutsungu teli i-u lotilo nupuno ahukikhalo tsuqupe ithuthu shekukuno ake.

⁶Ilomi ghenguno ino ahukikha khaqhitsu, ikemu paye cheve aghi. Niye pa sutsa chilunishi kutu ake! Ino pa phuju ikemu pa phumlave; ino pa ku-ju ikemu kiumu khochilemoe.

⁷Aphughi khechekemino ijuthuluve; panonguno iheqhi eno ighuzave; Aphughi putukeulo aghukhumino ikutsu kunha pewuvetsu.

⁸O Jerusalem lo totimiqo, ino nongu vilo pi ani, ike nonguno ilomi phulu aye niye pa kumsukutu ani kepi pa vilo pitsulo.

⁹Totimi gholo shishe ajukiviu, olomiye kutami nguno pakutakeu kesha? Kiulono olomiye kutami lomi nguno pakuta keu ani keno ni vilo pi ani kya?

¹⁰Ilomiye juvi eno choshiyike; paye 10,000 gholono kishephekulu ke.

¹¹Pa kutsuye shuna akiviu toi; pa samphuye ichhetsuoi eno agha mhi toi tsuloquike.

¹²Pa nhethiye aghokiti zu qowu akeulo amiqhi lakhi akichhizu kuchhu pusu akeshi jukighilepuke.

¹³Pa gimuchuye aghutulo khaghatu toi eno akighipi xathi toi jukivike. Pa mutsuye lapu xamunu toi thakutsughuve keu xokutsunguno nupu ani.

¹⁴Pauye akoghe kivishi shuna toi lhopepuani, eno akughuputu medakeu uloti kukhayi peani. Paphimpiye akuha hulo safir tu medapuku puakeshi phepheyike.

¹⁵Pa pukhuye alabastor tsukuchono ajoshi shunayi boqhalo shosu puake toi ani. Pa kogheye Libanon lo kishekiphe kedarsubo toike.

¹⁶Pa tsapiye jumghayike; paphi kumtsulo imusuluve kepu likhike. O Jerusalem lo totimiqo, hiye ilomi eno ikusauke.