Read Sumi Naga ALE KIMCHI 8 Bible Online

ALE KIMCHI 8 - Sumi Naga bible

ALE KIMCHI 8

¹Niye opelo ipeu shiaghi penishike, iza pelo pa kichhi opini pekeu shipenishike. Tishikeaye, ino alaghilalo osasu kugholu kelo niye omuma nicheke eno khunomu kiumu kumsupusamo nicheke.

²Niye osasu izano kilo wuni cheke, tilehino nono kimiyekeu ishikani cheke. Ino vepujuvekeu tsayiji otsuni cheke, iwu khaghatuji opiyeni cheke.

³Ou piyiuno ikutsu mumupe eno ou ajeuno ivape peni cheke.

⁴O Jerusalem lo totimiqo ino nongu vilo piani, nino kimiyekile akeu kupunatsu kevilo.

⁵Asayeqha kudau li lomi mungupesu chechekeu hupauye khuu kya? Pukhothibo qholo ino okudaputhuke, tileno ozano opunu niye ihi ake, tipa alono opunuke.

⁶Ikikimiye likhi thono kutami kumtsu launo omlo kha luvelo; ilikhi thono kutami khumu oulo khapelu kevilo. Kikimiyeye akithi toi akumtoke; anhekushuye akumokilive yikusa toike. Hiye phoi iquve cheni eno amino muha ketoi piti cheni.

⁷Azu kutomo nomu kimiyekeu yitsu pinhe mlake; atshunazu pimu tipau yimve mlae. Tsala timi lakhino kikimiye ghenguno pa kilo kuakini kumtsu pe tsu namu tiye kuthakughapu likhi ke.

⁸Nichepu alhothe lakhi ani li kichhiye aghulo likhi aphie. Apumino li hoighi aye ninguye li ghenguno kiu pitsuni kela?

⁹Lino putukhakeu liwo lakhike aye ninguno li salla tsandiyi pesu aghukhua lakhi mlatsuni cheke. Eno lino khagho lakhike aye ninguno Kedar su pesu atozu shikeuno li shokhakepu shitsuni cheke.

¹⁰Niye putukhakeu lakhike eno ikichhiye tipau ghukhuake. Ilomino ithi anike, niye pa gholono imlokiqi eno ilokughuno phulu cheni.

¹¹Solomon ye Bal Harmon ipichekeu alo atsayilu lakhi ake. Tile alukichimino pa launo tipau mishi chi cheke; milakhi khino tsandiyi pisa 1,000 tsuche.

¹²Solomon ye pawu pisa 1,000 luaghiluvi, eno alukichimino pano saje pisa 200 luaghi luvi; Ikemu niye isala iwu atsayilu ani!

¹³Ilomi, ipelo aghutu lono osutsa chilu pelo, ikusamiye nono pikeu ininiaye khekutoju anike.

¹⁴Ilomi, achuyi toi ilau ighilo, vekutsungu mukhu ipeghi akeu naghutolo aqhu lhothe lakhi toi ighilo!