Read Sumi Naga ISAYA 10 Bible Online

ISAYA 10 - Sumi Naga bible

ISAYA 10

¹Nonguye ahakusapuke! Nonguno amikucho kumo yezah mlape qhino iwu timiqo qaqhi chenike.

²Nonguno tishi puzu kumlhomi pelo achipiu ithulu nikeu eno amikucho kughakutha ithulu kepushi akeu ithumlave cheni. Nonguno tishi puzu topuchimemi ngo mighimghaqo tinhemgha luvetsu cheni.

³Alhou no kughou nongu ghimeqhini keno nonguye kishive nani kya? Pano putou ghakhumi pelo nongu shou kutsakungo keu sughikelo nonguye kishive nani kya? Akukuphu phunike nonguye khilehi powu nani kya? Nongu wu kinikuluye khile kusulu nani kya?

⁴Nonuye aghukishi lono pithive nani momu akughumi shi sunhe sawuve nani. Tishimu AMPEU loghu ye kishekhavemo nani; ghimeqhinike pau chhopuwo ani aphike.

⁵AMPEU no ishi pi, “O Asiriya! Ino opeitha puzu khunoqo shou iloghu ide anikeno tipaqo ghimeqhini.

⁶Alhou mthakemi shiayeh shou ino pa puwuni, iloghu shikighide kemiqo shou ino Asiriya puwuke. Ino panoqo puwukeuye alaghilalo aniba qodaneda keshi timiqo pukaqhi, xuleqhilu peniyeke.”

⁷Ikemu Asiriyami Kukauye pa kukumsulo heqhi buqhi nikeu kughuchhope ake. Paye ashiayeh kutomo kutsaqhi nikeu mlo puae.

⁸Pano ishi qhezake, “Iwu zahtsumi kumtsu kukamike kumo kesha!

⁹Ino Kalno phughi ngo Karkemish phughi, Hamat phughi ngo Arpad phughi leluveke. Samaria ngo Damaska ye ino leluveke.

¹⁰Ino i-u chhopuwo puzu ajulho shisuno mllachekemi yeghiqha ghimeqhike, tipaqolo ajulho aghikeu ye Samaria lo ajulho akeu nguno kumzapuke.

¹¹Samaria ngo tile ajulho aghikeu kumtsu ino kutsaleveke eno Jerusalem ngo tilau ajukimihi shisuno mlla chekeu jeli ghi tipaphi shi kutsalevetsu nani.”

¹²Ikemu AMPEU no pike, “Kughou Zion toghi lau eno Jerusalem lau ino kiu shitsu ani keno tipau shitave puzu Asiriya kukauno pa qhekuzashi akuchhoma shikeu ghenguno ino pa ghimeqhi nani.”

¹³Asiriya lo akukauno ishi aqhekuza shike, “Ika-agha lono ino shiluke, niye akumto alokutsu eno shitsake. Ashiayehqo dolo alughi aghikeu ino xavetsu eno panoqo kini khuki xuleluveke. Amshitsu toi tipaqolo kughuna aghikemi ino qodake.

¹⁴Ayeghiqhalo ashiayeh qoye aghau pusu lakhi toike, tipaulo ayikhu mulaleyi kicheluve keshi ino panoqo wu kinikulu xukutsuluveke. Ishikichi niaye achishibo lakhimu kukhumoe momu imighinike ahu lakhimu xukhomoke!”

¹⁵Ikemu AMPEU no pike, “Amughuye pa peitha akeu nguno akijeu kepi pikulupu kesha? Kuxuyi ye timi khuno tipau pesu kuxu chenikeno tipau nguno akhotou kesha? Asuthaluno timi lakhi ikhiqhe chemoe timiuno asuthalu ikhiqhe cheni.”

¹⁶Tighenguno aqokitikhi MPEU no akusu puwu puzu itehiye aqu-leleyi akeqo ghimeqhini cheni. Panoqo phimpilo amino piti-tiqhi anani.

¹⁷Alhou, Israil kuvu huye ami mili lakhi shive nani asahu ngo ashuyesahu shiaghi namu ghulo lakhi lono thwokha kumtsu pitive nani.

¹⁸Kusukini lhoksano timi tsaqhivekeu ghola lono, ghasughave kinikulu ngo aluchichekeu yeghi kumtsu qhoi kutsaleve nani.

¹⁹Asubo lakhi kini likhivekeu lono ititunu lakhi nomu tipaqo kihikhaluve nani.

²⁰Aghuloki wocheni, Israilmi khunoqo puxupe aghini keno tipaqoye pano kutsakhaveni cheghikeu shiayeh shou pukhube mlave kepu shi nani. Panonguye kuchouno AMPEU Israilmi Lhou akimtheu lau pulubekeu qhilu nani.

²¹Israilmi gholo timi aghulo likhino pano Lhou akumtou lau idechileghi nani.

²²Itehi Israilmi ye azughilo asaye jejehi aghi namu timi aghulo likhi ideghi nani. Timiqo ghengu kutsakungo keu qhipe puani eno tiye ithulu kuzupuke.

²³Kughengu ayeghi shou Aqokitikhi MPEU no kutsakungo keu sughini kepi pivekeu toi shini putsake.

²⁴AMPEU, aqokitikhi MPEU no pawu timi Zion lo xua kemiqo vilo ishi pike: “Asiriyamino Ijipmino shikeu toi nongu qoqhi cheghi namu nonguye panoqo musaichi kevilo.

²⁵Ado ikhonhei nongu ghimeqhikeu taveno tithiuye ino panoqo kutsave nani.

²⁶Ni, Aqokitikhi MPEU no Oreb Tuqu qhalo Midiyami ghaqhi keshi ino akichhe kighi pesu panoqo ghaqhi nani.

²⁷Tipa ghuloki ighikelo, ino Asiriyami kuka launo nongu khaqhi pheve nani eno panoqo khoye nongu bighi qaqhikithemove nani.”

²⁸Aghumi ghushimino Ai phughi khasuluvae! Panonguye Mikron kathasu wuvae! Panongu kho jeli Mikmas lo qhipuani!

²⁹Panonguye kakuthala kathavae eno puthoye Geba lo zuni cheni! Rama taunlo akemiye thughuyivae eno akukau Saul no achekeu Gibea taunlo akemiye pokhavae.

³⁰Gallim lo akemiqo, ighu iqhalo! Laisha lo akemiqo, inilo! Anathot lo akemiqo, khochile julo!

³¹Madmena ngo Gebim lo akemiqoye ihjeluniaye kuhapochenike!

³²Ishi tsalaye aghumiqoye Nob taunlo ani eno tilauno Zion toghi, ti Jerusalem phughi vilo kutotsu nani kepi au chishepiye ani.

³³Julo, Aqokitikhi MPEU no asuloka buqhikulu keshi panoqo loqhive nani. Panoqo gholo aqhekuzami eno chuqumghai kemiqo yeqhive nani eno aqhou saiqighive nani.

³⁴Amughu pesu aghasu mtalo asubo yeqhi keshi eno Libanon lo asubo kivi yekuluqhi keshi AMPEU no panoqo yeqhive nani.