Read Sumi Naga ISAYA 11 Bible Online

ISAYA 11 - Sumi Naga bible

ISAYA 11

¹Jese suzungu lono apishe lakhi ipeghi nani eno pakuhu lono aloka lakhi ipeghi nani.

²AMPEU Ghungu no alokutsu ngo akighithi eno asuqekithi pawu timiqo shou ayehpelu penike pa tsu nani.

³Paye AMPEU pulou ithi nani eno pa gihu nani, eno pa ghokulu shinike amloqi nani.

⁴Paye anhethino ithukulu likhi lono kughathamo nani, momu chikulu lo likhino xathabe mo nani; pano kumlhomiqo ghenguno achipiu lono kughatha nani; eno ichhe imechekemi chipiu phujutsu nani. Pano ahza tsukelo timi ghimeqhive nani, eno kixikilamiye pa tuthu kishe lono pithive nani.

⁵Pano kuchou xakutha eno amikucho lono pawu timi shou ayehpe nani.

⁶Atine ngo bheritiqono iqunei kumtsa acheuve nani eno angushuno aneti sasu iqunei ihozu nani; Amshiti ngo abongushuti no kumtsa achumuza nani; eno itimi kititiqono panoqo kheu shi nani.

⁷Amshi ngo avaqono kumtsa chu nani, eno panoqo tino kumtsa ihozu nani. Abongushuno amshi toi aghijini chu nani.

⁸Angaqono tughukupu pighi phivilo ililu nani, eno ititununo pighizu phivilo ililu nani.

⁹Alhou wu akimthe toghi Zion lo akuighupu eno shipusave kepu kiumu kuha nani. Azughilo azu chhitoi akeshi ayeghilo AMPEU kighithino chhitoi ve nani.

¹⁰Tipa tsalani David kuka lagha lono akukau akithe ipeghikeu no ashiayehqo lau amchipu kumla lakhi shi nani; panonguno aphughilo pa phuighi nani eno ajekipishi pa gihu nani.

¹¹Tipa tsala ighikelo, AMPEU no ghuthu akiniu ghi pa kuka peitha puzu pawu timiqo ayeghi hipaqolo qhivepuaghi keqo sachilesaghi nani: Asiriya, Ijip, Pathro, Sudan, Elam, Babilon, Hamat lo ngo zudo yeghiqolo eno azu sumxape akeqo yeghilo.

¹²AMPEU no ashiayehqo piyenike michiphi peqhe nani, tiye ayeghi cheku bidi lono Israilmi ngo Judami apanagha hale puakeqo itaghi hekutsu kumqono sachile saghi niyeke.

¹³Israil kukaqhaye Juda kukaqha jupesu khilemu anheshumove nani eno Juda ye Israil ghumi shimove nani.

¹⁴Kuma kumqoluve puzu kulolau Filistiyami lewu nani eno kipelau akemiqo tuleqhi leluve nani. Kumano Edommi ngo Muabmi shou aghutoluve nani eno Amunmino panoqo ghokulu shi nani.

¹⁵AMPEU no Suez lo azucheku puthovetsu nani eno pano shukuthui keu mulhu puwu puzu Eufrati ghokizu fuputhove nani eno aghokiti tsuni likhi qhive nani, tishi kehu timino alachesu kathawuluve nani.

¹⁶Asiriya kudauno alaghila lakhi pawu Isrilmi ghenguno auve nani, tilau puxupe aghikeqo ghenguno, tiye panoqo puasuno Ijip qhive no wuvekelo aghikeu toi nani.