Read Sumi Naga ISAYA 16 Bible Online

ISAYA 16 - Sumi Naga bible

ISAYA 16

¹Asayeqhalo Sela phughi lono Muabmino Jerusalem lo ayehpe akeu lau bheriti lakhi pesu agho tsupuwu,

²panonguye Arnon ghoki muku lono ngokhea eno aghau apusu lono haphevekeu toi akimji kuhano azuu toi athiu toi iqho iqi ake.

³Panonguno Juda lo akemi vilo ishi pi, “Kiu shikepu keno nivilo pilo. Puchou shukuthui akelo asubono muko tsuzuikeu kicheqho shikeu toi ningu susholuvelo eno ningu pelo okichiqholo akulhoqhilu pelo. Ninguye kupokichemike; timi khunomu ningu phumlakepu alo nikusuvelo.

⁴Nipelo no yeghilo ngopelo. Ni kutsave nishi chekemi launo nisusholu velo.” (Qodanedakeu ngo kutsakungokeu ashekha shive nani eno khunoqono aghakhu kutsakungo ani keno cheve nani.

⁵Tithiuno David laghami lakhino akukau shive nani eno pano amikucho ngo kikimiye lono timiqo shou ayehpe nani. Paye achipiu shinikeulo xathai nani eno achipiu xakutha shitsu ani kemokeno pano jutsu nani.)

⁶Juda lo akemino ishi pi, “Muab lo akemiqoye kiu toi aqhekuza keno nino chiluvae. Nino ithianike panoqoye akuchhomami eno alikhi apavi kemiqoke ikemu panongu qhekuzaye abo kumsake.”

⁷Muab lo akemiqoye shilukusa shi imekeu ghenguno qamlo nani. Panonguno Kir Heres phughilo achuqupu akivi chuchekeu kughono kumsuluni keno panongu kumtsuno mlo qa nani. Panonguye amlo hauve nani.

⁸Heshbon phivilo aluqo akeu ngo Sibma tsayilu lono atsayiji mlaphekeuno ashiayehqo shou ayehkipemi shokumzu chekeu hu shipusavae. Ghuthu lakhi ye tipau tsayiboye Jazer phughi kutolo pepimhe cheke; eno kipelauno asayeqha kutolo eno kulolauno Akithi Zughi tuxa kutolo pepimhe che.

⁹Itehi niye Jazer ghenguno qamlo keu toi Sibma tsayibo ghenguno qamlo anike. Niye Heshbon ngo Eleale ghenguno inhezu piji ani kughengu axathi xopuwo timi lopivi kepu kuhave ake.

¹⁰Khunomu itehiye aghuma luqalo alovi movae. Khunomu atsayilulo igha alephe movae. Khunomu atsayiji shinike atsayithi qolemovae; alokivi ghugha ashekha shivae.

¹¹Niye Muab ghenguno amloksa shi ighake, Kir Heres ghenguno amlo kughuju shike.

¹²Muab lo akemiqoye wuno naghutolo achinekilo wuno inikhu chekeu angaghaivae, ikemu tiye panoqo kivipu shiluni chemoe.

¹³Tiye AMPEU no puzuuno Muab ghenguno atsape tsukeuke.

¹⁴Itehiye AMPEU no piani, “Loi ampe kuthu lono Muab wu kinikulu kumzapu hu hauve nani. Tipaulo timi kutomo achekeu hu aghulo likhi ghuluni cheni eno panongu ghi miqemileyikemi shive nani.”