Read Sumi Naga ISAYA 2 Bible Online

ISAYA 2 - Sumi Naga bible

ISAYA 2

¹Alhou tsape hipauye Amuz nu Isaya no Juda ngo Jerusalem ghili ithukulu tsake:

²Ighinikeu tsalaloye AMPEU chineki shipuku puakeu naghutoye naghuto kutau kumtsu nguno akiqheu lakhi shiluve nani, naghuto kumtsu nguno qhemghaive nani. Ashiayeh kutomono hipaulo qokive ilo nani.

³Timi kutomono ighino pi nani: “Ighilo ningu AMPEU naghutolo iqhoni, Israil Lhou chinekilo wuni. Tileno paye ningu pelo kiu shipe nishi anikeno pano ningu shika nani; ninguno pano kishetsukeu laghi pulani. Kughengu AMPEU kukutsuye Jerusalem lono ighi nani, Pano Zion lono pawu timiqo putsa nani.”

⁴Pano ashiayeh dolo kughatha nani, eno timi kutomo ghenguno xatha tsu nani. Panonguno azutakihi hepha pesu akuphu shive nani; eno panongu ngu pesu asubo kikixi zutachi shive nani. Ashiayeh qoye khilemu aghulalo wukithemove nani, khilemu aghukishi ghenguno kutokupui keu shimo nani.

⁵O Jakob laghamiqo, AMPEU no akuvu ningu tsupuakeulo checheni nolo!

⁶O Alhou, noye owu timi Jakob laghami qhiveke! Ayeghi kumtsu kipelau ngo Filistiyami launo sughikeu kuduu shichekeuno chhivae. Timiqoye inaghami ghushoghili pape wuvae.

⁷Panongu yeghiye tsandiyi ngo shunayino chhivae eno panoqo wu akini pekutsukeu-aye ashekha kuhamithevae. Panoqo yeghiye khurshino chhivae eno panoqo wu khurkulu kumzapushi qhevae.

⁸Panoqo yeghilo ajulho shisukeuno chhivae eno panongu uno mlakeu asu-atu mllau khavae.

⁹Panongu kumtsu haqhive nani eno kujomzavepe nani. Panongu kipimi pevetsu kevilo, O AMPEU!

¹⁰Panonguye AMPEU loghu lono poveniye pukaputsa kelauno eno pa kimthe jukuvu ngo pa kuka launo itshuwuve nishi kelauno naghuto tuxu tukilo itshu nani momu ayeghi lo aqoh chhu nani!

¹¹Timino aqhekuza shichekeu kishekha nikeu eno timino akuchhoma shiche keu kutsapinyive nikeu tsala lakhi cheni. Tipanino AMPEU likhi xaqhepuku keu tsala shinani.

¹²Tipa tsalanino aqokitikhi MPEU no akuka kumtomi eno chuqumughai xuchekemi ngo aqhekuzami eno kumobeyi chekemiqo aqhokighepu shivetsu nani.

¹³Pano Libanon lo kedarsubo chuqumughai akeu eno Bashan yeghilo aphisuqo kutsapinyive nani.

¹⁴Pano naghuto kiqhe eno atoghi kiqhe kumtsu jokumtsave nani,

¹⁵aghukhu qokighe ngo aliwo kuptu kumtsu kutsaleve nani.

¹⁶Pano zukilu kuloghi ghi eno jukighilepu zukilu kumtsu putsuqhive nani.

¹⁷Timi qhekuza kishekhave nani eno timi chhoma kutsaleve nani. Ajulho shisukeu kumtsu qhoi hauve nani eno tipa tsalaniye AMPEU likhi xaqhepukukeu tsala shive nani.

¹⁹Kughou AMPEU no ayeghi sukiniqhiniye ighini keno timi qoye pa loghu zulo eno pa kuka kumto jekipi zulo musa kelauno povejuniaye naghuto tuxu tukilo itshu nani momu ayeghilo aqoh chhu nani.

²⁰Tipa tsala ighikelo panonguno shunayi ngo tsandiyino shisukeu ajulhoqo peve nani eno tipaqoye idelaghu ngo ashuqha sala shi qhive nani.

²¹Kughou AMPEU no ayeghi sukiniqhiniye ighini keno timiqoye pa loghu zulono poveju niaye eno pa kuka kumto jekipi launo itshunike ghenguno naghutolo akighipe ngo atukilo itshu nani.

²²Thivenikuau timi lau khilemu pukhube kevilo. Panonguye ame kuhae!