Read Sumi Naga ISAYA 23 Bible Online

ISAYA 23 - Sumi Naga bible

ISAYA 23

¹Hiye Tur ghenguno atsape lakhike. Amlo kughujushi ighamukulo, nongu azughilo zukilu kusamiqo! Nonguno ngochekeu Tur kutsalevae; tipaulo akiqo ngo zukilu kungoa kumtsu ixapinyi ani! Nonguno Cypras yeghilo akelono hipau sutsa nongu toke.

²Qani mlo alo, Sidon lo alhikishimiqo! Nonguno nowu timi azughi kathapuwo cheni,

³tiye Ijip lo ipeghikeu thi qhu eno jewu peniyeke eno ashiayeh kumtsu sasu kilhisho niyeke.

⁴Sidon phughi, noye kujomza kepu shivetsuae! Azughi eno azughi kije, akutho qono osalumokeu piani, “Niye anuli kuhae. Niye anu momu angaqo saputhu chemoe.”

⁵Kughou Ijipmino Tur ye kutsapinyive keu chiluni keno panongu ghi thughuive nani eno thibuive nani.

⁶Amlo kughujushi ighamukulo, nongu Fonikamiqo! Spein lo poniaye pukaputsa julo!

⁷Alokivipu phughi Tur, ado kushuwa lono mlavekeu huye hukesha? Azughi kathasusu aphu kutau shipeniye phuthekuwomi puwuchekeu phughi hipau kesha?

⁸Tur shou hipaqo kumtsu sughikeuye khuuno kughupe qhi kya? Qhasuachekeu phughi hipaulo alhikishimi sakiphemiye ayeghilo timi kumtsuno shishe gihu cheke kumo kesha?

⁹Aqokitikhi MPEU no hi kughuke. Pano hipau kughukeuye panoqono kiu shilu keno tipaulo qheza chekeu kishekhave tsuniyeke eno tipaulo timino gihu chekemiqo ghada qhiniyeke.

¹⁰Wulo eno noyeghilo alu chiulo, nongu Spein lo aphu shipe akeulo akemiqo! kiumu hakhakeu kuhavae.

¹¹AMPEU no azughi shou pa-u chhopuwo eno akukaqha takideve. Fonikami lhidi lhighi-a kutsave nikeu ahza tsuke.

¹²Sidon phughi, olokivi tsalaye ashekha shivae eno now timiqoye nedaqodape auvae. Panonguno Cyprus kudau pove namu tilau ghi panongu puxuni chemoe.

¹³(Hiye Asiriyamino kumo puzu Babilonmino Tur shou tughashi koha-kive popeke. Lenikeu aliwo shipukukeu huye Babilonmino ke, Tur puwukha puaghikeu tuleqhive tsu ke eno aphughi hu ixapiniyi qhive.)

¹⁴Amlo kughujushi ighalo, nongu azughi shou zukilu sachekemiqo nongu pukhupe achekeu phughiye kutsalevae.

¹⁵Tipa tsala ighikelo Tur ye ampe lhotsuni kutolo kumsumave nani, tiye kukami kuxudo tohike. Kughono ampe tipaqo taveni keno Tur ye ale lakhilo kutuqhami lakhi toive nani:

¹⁶Okighi lebo ikhilulo, taun veho wulo, no-akumlhou, kumtsuno kumsumavekeu kutuqhaliu! Oleqo itaghi igha phelo, timiqo ghuthu akiniu saideghinike.

¹⁷Kughono ampe lhotsuni taveni keno AMPEU no Tur pelo puzuu lino lhidi shichekeulo idewovepe nani eno ayeghiqhalo ayehkipeqha kumtsu pelo li piqelu penike lino tsu nani.

¹⁸Lino lhidi lhighi shikeu lono qelukeu pisa pesu AMPEU kumlapu ghenguno tsu nani. Liye tipau kikepe qhivemo nani ikemu khunono AMPEU mlla cheni keno tipaqono li wu pisa pesu panonguno avehupushi akeu chuqupu ngo aphimini qhunani.