Read Sumi Naga ISAYA 29 Bible Online

ISAYA 29 - Sumi Naga bible

ISAYA 29

¹Alhou wu akipti khache Jerusalem ye ahakusapuke! David no khilehi aphiki shipe ngokeno tiye hasapuke! Ampe lakhi ighieno wove pelo, tipaulo kuchukusho ngo tiqhetini shi

²no tithiuno “Alhou wu akipti khache” ipi kuchekeu phughi shou Alhou no kutsakungo sughi nani. Tile mulo qakeu eno qanhe nhekeu ani eno aphughi kumtsu akipti khache lakhi ajino nha luvekeu toive nani.

³Alhou no aphughi leighi nani tipau suholuve eno tipau khasuluve nani.

⁴Jerusalem ye aghahwu lakhino ayeghi qhouno ighaphemlano kide akeshi ayeghi mukhu lono asutsa ghegheshi ipeghikeu toive nani.

⁵Jerusalem, inaghami khunoqono oleighinikeno panonguye ayeghi mukhu toi fulesawuve nani eno panoqo ghushimi akuighupu shiakeqoye aghijini toi fupe wuve nani. Zuleno eno huqhemoke lono

⁶Aqokitikhi MPEU no tsutsukusu pasapagha khumuyi keu eno ayeghi kughutha gholono oxaphelu nani. Pano miyitsu pasapagha eno ghuleqhikeu mi kuyiqu puwu nani.

⁷Tileno Alhou wu akipti khache phughi leighi akemi ashiayehqow ghushimi kumtsu, panoqo ghunanu eno pepimhechekeu nhemgha thwokha kumtsu asamo lakhi toi hauve nani, putho lono kumsukeu toive nani.

⁸Ashiayeh khunoqono Jerusalem lenike kumqo akeno kumtsu muzuthikemi lakhino pa samouno chua puzu idathughi kelo muzuthi aghikeu toive nani momu timi lakhi tughuthi puzu thiuche kelo paye azuye achekeu pumolu puzu akughoki qhayi idathughi keu toi nani.

⁹Izuphokicheyi alo eno hevulalayi alo! Anhethi iche alo! Atsayiji sumokeu pesu shomzupu alo! Aji shomzumo amu izuvulayi alo!

¹⁰AMPEU no nongu pelo ingufufuyi anipeke eno cheyi zuhuve peniye kuto anipeke. Tungkupmiye kutami nhethi shikepushi ake ikemu Alhou no panoqo nhethi kighicheve tsuake.

¹¹Kungunhetsu hipau kiqi kumtsu nongu launo kusupe qhivae tiye likuzu kaku mekhavekeu lakhi toivae. Nonguno phithi akemi lau tipau pewuno pa vilo tipau phipe opiye lopi napiaye paye tishimlake pinani kughengu tiye mekhaveake.

¹²Nonguno phimthakemi vilo phipiye peniye tipau pewuno iniju aye, tiye kishi phicheni kela paye mthakepi okhochile nani.

¹³AMPEU no pike, “Timi hipaqono akichiloye ikupunu imlla cheni ikemu panongu tsaqoye akiqi kuhae eno panongu mloye khile anikela mthake. Panoqo chineyeh ye timino shikeu yeh eno pe kishe chekeu yeh panonguno mlokite shipusu akeu kethono kiumu kuhae.

¹⁴Tighenguno julo, ino itaghi timi hipaqono lajumono akeu ghime pesu panoqo shithughuyi nani. Khunoqono alokutsumi kepi acheni keno kughuzumi shive aghi nani eno pano shitsa jeli kumtsu adou shive nani.”

¹⁵Khunoqono panono kughupe puakeu AMPEU launo kusu veni keno tipanoye ahaksapuke! Panonguno kusuuno panono kumqu puakeu shi acheni, eno khunomu panongu ithuluni chemo momu khunomu panonguno shiakeu ithini chemo kepi kumsu acheni.

¹⁶Panonguno thwokha kumtsu tsutshuuno tutsughuve cheni. Khikhiuno akhotou kya? Alikishiu keo aghani kya? Timino kiuala mlapuakeu huno pa vilo, “Nono imlake kumoe” ipi pilu nani kesha? Momu tipauno pa vilo, “Nono kiu shiani keno noye mthake” ipi pilu nani ma?

¹⁷Ishi pichekeu anike, ado kushuwa kumolo aghasuye alukichipu yeghi shive nani eno alukichipu yeghiye aghasu shive nani.

¹⁸Kughou tipa tsala ighini keno, akini kughupomino kaku lakhi phisukeu chilukepu shilu nani, eno anhethi kighichemino zumoyike ngo zuchiyikeulo acheno pano nhethi xukholu puzu ithulu nani.

¹⁹Kumlhomi ngo aqhokighemiye AMPEU Israil Lhou akimtheuno tsukeu lokivi itaghi ghuthu lakhiye phulu nani.

²⁰Tishikeuno kutami qodachekemi ngo Alhou phimo gihumo kemiqoye tino ashekha shive nani. Axinemi kumtsu kutsaleve nani.

²¹Khunoqono kutami thaigha, khunoqono heqhi buqhi kemi ghimeqhini keu lakha cheni eno khunoqono amikuchomi pelo achipiu xakutha ithulupemo niaye akimki tsa picheni keno Alhou no kutsapinyive nani.

²²Ikehu AMPEU, Israil Lhou shiluksa lono Abraham xaphelukeu huno pi nani, “Iwu timiqo, nonguye kujomuza kithepe moake eno nongu gi pelo akukujo launo phalayi pemoake.

²³Kughou ino anuliqo nongu tsuniye akeu nonguno ithuluni keno tileno niye Israil Lhou akimtheu kepi nonguno iyikhilu nani. Nonguno igihu nani eno nonguno ijupesu musa ighuqhiyi nani.

²⁴Kughuzumino vethaluni keu shikalu nani, eno khunoqono pulhapuju muchho acheni keno shikapiye penikeulo alovive nani.”