Read Sumi Naga ISAYA 3 Bible Online

ISAYA 3 - Sumi Naga bible

ISAYA 3

¹Kughengu julo, aqokitikhi MPEU no Jerusalem ngo Judia timiqono pukhupe achekeu jeli thwokha pewuve tsuni cheni. AMPEU no panoqo chuqu kushopu eno

²panoqo ghutomi ngo ghushimi panoqo shou aye xakuthami, tungkupmi, asaqhijutsu chekemi alokutsumi kichimiqo,

³ghushimi sakiphemi mishi sakiphemi, mijekulami kuduu shichemi ado peithakiche hipaqo kumtsu ikhi suwuveni cheni.

⁴AMPEU no ititunuqo pelo timiqo kukau shipe nani eno michimununo panoqo shou ayehpe nani.

⁵Eno timiqoye lakhino lakhi qodaqhi nani akusamino akusami, akitomino akitomi qodaqhi nani. Lhothemino kichimi phimo nani eno kusakughamino gihu kuzumi phimo gihumo nani.

⁶Atuqhudo cheni, kughou alaghamino pano laghami lakhi kishephe puzu pavilo, “Noye umini kepu hami likhimu anike ghenguno shiluksa do hipaulo nono ningu sakipheu shilo” ipi pinani.

⁷Ikemu pano ishi khochile nani, “Niye khilemu tishi mlae! Niye nongu kuphumlae! niye achuqupu momu aphimini pimu kiumu kuhae. Ipelo nongu sakipheu shipe kevilo!”

⁸Kughengu Jerusalem ye xale qhivae! Juda ye ikiqivae! Panonguno pi shikeu kumtsu AMPEU hebide anike; panonguno kumtsu nhekithe lono AMPEU phimo gihumoke.

⁹Panonguno axo lunishimokeu huye panoqo shou ashepe shiauvae. Panonguno Sodommi no shiketoi kumtsu nhekithe lono axine shike. Panonguye xaleqhini putsa eno tiye panonguno pano likhi pano shou alhoksa sughi anike.

¹⁰Amikuchomiye alokivishi nani eno panoqo ghenguye akivipu shilu nani. Panonguno kiu mlaqhilu keno tipau pepimhe alu nani.

¹¹Ikemu alhoksamiye ahakusapue! Panoqoye avekusapu sholu nani; panonguno timi lau kiu shiche keno tipau panoqo shou shipuku nani.

¹²Pisa kupunamino iwu timiqo qaqhike, eno iwu timi qono api lokepushi akeqono panoqo pishiqhike.

¹³AMPEU ye pano kughathakepu akeu pinike kutope ani. Pawu timiqo shou kughathabe nike kutope ani.

¹⁴AMPEU ye pawu timi sakiphemi ngo mijekutsumi kughakuthapulo saghini cheni. Pano hipau vehu pesu panoqo nguku ani: “Nonguno atsayilu pukaqhike eno kumlhomi launo luvekeu pesu nongu kilo chhitoi puani.

¹⁵Iwu timiqo chunuqhikeu hiye kiu eno kumlhomi shipughuqhi keu hiye kiu kya? Ni, Aqokitikhi shou AMPEU Alhou no pi anike.”

¹⁶AMPEU no piani, “Jerusalem lo totimiqoye kishi aqhekuza kela julo! Panonguye akuo shohe pesu iqho iqi acheni. Panonguye ghaghu nhethi xapu acheni. Panonguno cheiqho iqi cheni eno panoqo launhelo amuquno igha asutsa shicheni.

¹⁷Ikemu ino panoqo ghimeqhi nani; ino panoqo kutsusa miyevetsu eno boghesho shivepe nani.”

¹⁸Atsala lakhi cheni, tipanino AMPEU no Jerusalem totimiqo launo panonguno akijivilo qhiyi achekeu nhemgha kumtsu suwuvetsu nani. Achipu achila ngo akusa asapu jeli alaunhelo ngo akutsulo, akuolo

¹⁹eno aunhelo pepu aghikeu kumtsu luvetsu nani. Panoqo gi kunha phi ghi pano luvetsu nani

²⁰eno pano kutsukuqho ngo kuduu gha panoqo umlolo ngo panoqo chitalo pepuakeu;

²¹panoqo ulotikukha ngo anigipelo akukhayi;

²²uminikeu phi ngo he-uminikeu phi eno aphikuzu jeli eno pisabo kumtsu luvetsu nani.

²³Panoqo phimini jupili ilo ithulukeu, mutshaminhei keu akughusuu eno panoqo kutsu shonhapu keu phi ngo akutsu kuzupu keu phi kumtsu suwuvetsu nani.

²⁴Tsungquikeuxo zuqhulo panonguye munashushui nani; apokha aghile zuqhulo akichhekighi ghaghaikeu pepu nani; asa kivi puchekeu zuqhulo panonguye boghesho shive nani. Aphimini kivi zuqhulo panonguye itamujuyi keu pepu nani; panongu jukiviye akukujopu shive nani!

²⁵Nowu timi, akumtomiqoye aghukishi lono ghiqhive nani.

²⁶Aphughi kuptu kikhano mloqa ighamuku nani eno aphughi huye totimi lakhi aphimini xavetsu puzu ayeghilo iqa akeu toive nani.