Read Sumi Naga ISAYA 31 Bible Online

ISAYA 31 - Sumi Naga bible

ISAYA 31

¹Khunoqono Ijip kukuphu luniye wunikeno tipano haksapuke! Panonguye Ijipmino akumtoshi aghushikepu khurshi, khurkulu ghushimi kumzapu akeu pukhu anike. Panonguye AMPEU, Israil Lhou akimtheu pukhumoke momu kuphupenike pa vilo inijumoke.

²Paye kiu shiani keno pano ithi ani! Pano kutsakungokeu puwu, pano alhoksami ghimeqhinike eno tipanoqo susho chekemi ghimeqhinike shikichikeu pano peitha cheni.

³Ijipmiye aghahwuke kumoe, panonguye timi ke. Panongu khurshiye palhoaye kuta keu kumoe. Kughou AMPEU no itha wuveni keno ashiayeh kumtoye ipopiniyive cheni eno panono miqemileikeu shiayeh kuphu keu ghi ikiqive nani. Kuma kinikujo kutsaleve nani.

⁴AMPEU no ivilo pi, “Akheuno kiwala papushi chho chhoshi hakho anamu abongushu lakhino lhoxu lakhi tsupesu akeu hakholu chemoke; tihutoi ni Aqokitikhi MPEU no Zion Toghi sushope akeu lono kiunomu ihapupove mla nani.

⁵Aghau lakhino liti sushoni kehu lipusu yemxa kehutoi, ni Aqokitikhi MPEU no Jerusalem susho nani eno tipau shokhalu nani.”

⁶AMPEU no pi, “Israil lo akemiqo, nonguno ishou axine shike eno imujochileke. Ikemu itehiye ilau ideghi lo!

⁷Kughengu atsala lakhi chenike nongu milakhikhino pawu tsandiyino shikeu ajulho ngo shunano shikeu ajulho peve khave nani.

⁸Asiriya ye timi kuka lono kumono aghushi lono kutsave nani. Asiriyamiye aghu shiakelo pove nani eno panowu lhothemiye aquaxemi shivepe nani.

⁹Panoqo shou akukatouno musakhokhoshi pove nani, eno kijemiqo ye shishe kichimamave kelauye panoqo michiphi ghi qhive nani.” Jerusalem lo mlla chekeu MPEU eno akumllagho ami pesu pitive chekeu MPEU no piveake.