Read Sumi Naga ISAYA 32 Bible Online

ISAYA 32 - Sumi Naga bible

ISAYA 32

¹Julo, kukami lakhi iqemokeu mikucho pesu ayehpe nani, eno aghakhu sakiphemino kuchou xakutha lono ayehpe nani.

²Panoqo lakhikhino amlhu launo susholukeu toi nani eno pasapaghalo itshuluke-a toi nani. Panonguye asayeqhalo aghokiti qowu ake toi nani, asutsuni kuhake-alo atuqu kuloghi yekukhu toi nani.

³Panoqo nhethi eno akiniye timiqono avehupu shiakeu kudau kughopuwu nani.

⁴Panonguye khea khamlakeu shimo nani ikemu ithitoikeu vehu mla itha nani eno akiqi akeu tsa pinani.

⁵Timi khuumu kughuzumi ye gihukepuke ipi kumsumo nani momu ayehkumthamiye amikuchoke ipi pimo nani.

⁶Kughuzumi lakhiye aghuzutsa pi cheni eno alhoksa shinikeu kumsupu acheni. Pano mla itha eno piche keuye AMPEU piputha keuke eno paye muzuthi kemi khilemu pulhu chemo momu tughuthi kemi kiumu piye chemoe.

⁷Nikhanighamiye alhoksake eno alhoksa shicheni; pano akimiki lono kumlhomi shipusanike kumqu cheni eno panoqo chipiu ithulupenikeu pano lakha cheni.

⁸Ikemu timino gihukuzupu shinikemiye amikucho shicheni eno kiuno achipi keno tipau ghenguno mutotoi puthugho cheni.

⁹Nongu, totimi khunoqono ililaike kuxu xucheni eno kiumu amlo kusa kuhano acheni keno ino kiu piani keno inijulo.

¹⁰Itehi nonguye aghaqilu aghiluvi ikemu ighinikeu mipe hipa ghulokilo nonguye avekusapu sholu nani kughengu nonguye atsayithi xolukepu kuha nani.

¹¹Nonguye akuxu ililai eno amloksa kiumu kuhano achenike; ikemu itehiye musa khokho shi alo! Nongu phimini xalevelo eno aphinhe pesu nongu po khapulo.

¹²Amlo ghuju lono amla kukhulo kughengu aghuma luqa ngo atsayiluqoye kutsakhave ake,

¹³eno asahu ngo koghesahuno iwu timiqo yeghilo ipeghi ani. Aki khilehi timiqono alokivishi achekeu, eno aphughilo alokivi kuxu shiakeu ghenguno qahlo.

¹⁴Kukamiki ghi qhive nani eno aphughi ghi qhoi pheve nani. Aki ngo aliwo khipaqono panoqo khe pesu ache keno alhokupujulo ixapinyive nani. Tughalo gadahano tilehi iqho iqi nani eno bheriqono tilehi achumuza kepu ithulu nani.

¹⁵Ikemu itaghi ghuthu lakhi Alhou no pa Ghungu puwu nani. Lumovekeu yeghiye aghuma yeghi shive nani, eno aluqalo axa kinikulushi pithi nani.

¹⁶Aghakhu kumtsulo amikucho eno kuchou xakutha lono shitsu nani.

¹⁷Milakhi khino kiuno achipiu keno tipau shinanike ghenguno kulakishi eno sushokulu pulhapujulo anani.

¹⁸Alhou wu timiqoye amlokusa kuhano ililai nani eno panoqo kiboye iquneikeu anani eno hexakeu kuha nani.

¹⁹(Ikemu Aghasulo avu qi puku nani eno aphughi suphopinyive nani.)

²⁰Nongu azu kutomo akeu phivilo axa yisu kemiqo lokivipuke eno gadaha ngo amshiqo ghenguno aqha kumtsulo achu kumzapu akivi anani.