Read Sumi Naga ISAYA 33 Bible Online

ISAYA 33 - Sumi Naga bible

ISAYA 33

¹Nighumi ghenguno ahaksapuke! khunomu panoqo wu pukalumo momu panoqo pesu athe shisuvemo kemu panonguye pukaluve eno athe shive anike. Ikemu panoqono pukanikeu eno athe shini keu ghuloki ashekha shive nani eno kutamino panoqo pukaqhi eno xaleqhi nani.

²AMPEU, nikimiyekutu tsulo. Nino oshou pulube anike. Tsalakipe tsulo nisusholo eno shiluksa ghulokilo nixalu tsulo.

³Kughou nono nighenguno aghu shinikeno, ashiayeh qo ye aghushi akeu sutsa chilu kelo pokhave nani.

⁴Aningano xukutsu keshi eno atikhano ilhewu keshi panongu nhemghaye timino lhewo xulepuwuve nani.

⁵AMPEU ye kiutoi kije kya? Pano thwokha shou ayehpe nani. Pano achipiu xakutha ngo amikucho pesu Jerusalem shepichhi nani

⁶eno tipano shiayeh iqughayikeu pesu tsu nani. Pano pulhapuju pawu timi susholu cheni eno alokutsu ngo akighithi panoqo tsucheni. Panoqo wu akinikua akijeuye AMPEU sumsakeuke.

⁷Amlo kuloghimino kuphupenike kuani. Lashikami ala kishi sughinike pukaputsa chekemiye shishe qa akhani.

⁸Aghuzulaqoye shishe kumsapu kehu khunomu tipaqo pula chemoe. Kulashipuakeu hepho eno pulokileve keu hexake. Khumu qhoqhu chemoke.

⁹Aghakhulo ayeghiqoye pheveno qanimlo ani. Libanon ghasuye kilimughoyivae, aghumakua Sharon khilaye asayeqha toivae eno Bashan ngo Karmel Toghilo asuboqo nipa ye ighiqive ani.

¹⁰AMPEU no ashiayeh qo vilo piani, “Itehiye ino ithajuni cheni! Niye kiutoi akumto keno ino piyeni cheni.

¹¹Nonguno ame kuhakeu kughu acheni eno nonguno shikeu kumtsu adouke. Ighenguye ami lakhike nongu kutsapinyive nani.

¹²Chun kughulhonike atuqu piti kumtshakeu toi nonguye ipopinyive nani; asahu piti pesu ayevu shivekeu toi nani.

¹³Aphivilo ngo putou akemiqo pelo ino kiu mla keno chilu pelo eno ikuka ithikithe pelo.”

¹⁴Zion lo axine shiche kemiqoye musaighu khokho shi ani. Panonguno ishi pi, “Alhou wu kughakuthaye pulhapuju ami toi iqu acheni. Ningu khuuno titoikeu mi lono puxukulupu kya?”

¹⁵Nonguno achipiu picheni eno shicheni aye nonguye xukulupu shinani. Nongu kuka peitha puzu kumlhomi pishiqhino kulugho lukevilo. Timi ghiqhinike kumqu kemiqo gholo ilokevilo momu kutau alhoksa kumla shikevilo.

¹⁶Nonguno hishiaye nongu xaluve nani; nongu aliwo kumtolo ngolu keshi nonguye ithamokepu shi nani. Nonguno chukepu achuqupu ithulu nani eno yekepu azu ananike.

¹⁷Itaghi ghuthu lakhi akukau lakhino ajekipishi ayehpe keu nonguno ithulu nani eno putou kutolo pa yeghi jochho akeu ithulu nani.

¹⁸Puzuu nonguno inaghami zahme qha keu eno nongu miqe chekemi musachekeu huye akukumsu likhi shive nani.

¹⁹Nonguye inaghami pa likhi pa kijivilo ghi nonguno mthakeu tsa pichekemi ithulu kidemove nani.

²⁰Khile ninguno tiqhetini pinyi chekeno tipau phughi Zion julo, Jerusalem lo julo! Hiye ngokepu a-a kivi lakhike! Hiye khilemu iqemokeu phiki lakhi toike, tipau fukepu ayishuye khilemu sujomoke eno tipau kighi khilemu suthamoke.

²¹AMPEU no pa kimthe jukuvu ningu piye nani. Ninguno aghoki kije eno aghokiti qhachhokeulo xunani ikemu aghumi zukilu ye tipaqolo tuha sawumo nani.

²²AMPEU ye nishou kughakuthau, paye niyehkipeu, paye nikukau; pano nixalu nani.

²³Zukilulo akighi tshupukukeu tsukuchoye adouke, aphi fupe wupekeuye xachhomlake! Ninguno nighumi aghushi akeqo wu kinikulu tsuquluve nani eno tiye kumzapu kehu ayiku ipavekemi ghi pano saje anani.

²⁴Niyeghilo auvekemi khunomu suani kepi itaghi muchhomo nani eno axineye kumtsu pevetsu nanike.