Read Sumi Naga ISAYA 34 Bible Online

ISAYA 34 - Sumi Naga bible

ISAYA 34

¹Ashiayeh jeli timi kumtsu ighilo! Kuhokumqono inilo. Ayeghi eno tile lhoxu akeqo kumtsu hilau ighino inijulo.

²AMPEU ye ashiayehqo kumtsu eno panoqo wu aghushi chekemiqo lau aloghuide ani. Tipaqo kumtsu kutsave penikeu shi pano kideqhivae.

³Panoqo kithikumoye qhomo nani ikemu tilehi tsu-ma munashushui nani eno naghutoqoye ajino huchuyive nani.

⁴Tsukinhe, aqhi eno ayepuqoye ipopinyi amukhu shive nani. Atsutsuye likuzu kaku toi kuzupesu hauve nani eno ayepuye atsayibo momu khughuthibo lono anipa ighiqike toi ikiqive nani.

⁵AMPEU no kungughalo pa zuta kihi kutope ani eno itehiye tipauno Edom ghi nani, panoqoye kutsaveni keu shi pano kideqhive kemiqoke.

⁶Pa zuta kihiye aji ngo athano kuzuluve nani, tiye aghashi keulo bheriti ngo ane ji eno atha akeu toike. AMPEU no aghashi keu hipauye Bozra phughi lono shi nani. Pano Edom yeghilo ghikiqhi kije lakhi shi nani.

⁷Timiqoye amshitsu ngo ashithe tsu toi iluqive nani eno ayeghiye ajino huchuyive nani eno athano kuzuluve nani.

⁸Hiye AMPEU no Zion xaphelukeu ghulokike eno pa ghumiqo shou amukhu lu nani.

⁹Edom ghokiqoye alikatra kughulhove nani eno ayeghi ye amichu ilhouve nani. Aghakhu kuchopu alikatra toi piti nani.

¹⁰Hiye putho pucho piti nani eno amichhino alhokupuju phoipeghi nani. Tiqheli kutolo ayeghiye shipusa pesu tishi auve nani eno khunomu itaghi tipau vechesu izuwumo nani.

¹¹Aqhaqho ngo aghaqono ayeghi chhive nani. Tsutsu yeghibo lhophe mphilo akeshi, AMPEU no tipau pesu itaghi asakughutsumono shipusave nani.

¹²Aghakhulo ayehpenike akukau kuhave nani eno sakiphemi kumtsu cheve nani.

¹³Asahu ngo koghesahuno kukami kungoki eno putupuakeu taun kumtsulo ipeghi nani eno tungtugha ngo aqhaqhono tipaqolo acheuve nani.

¹⁴Tughashino tilehi iqho iqi nani eno tughamino lakhino lakhi kuku kile nani. Putho ghahwu no ngokepu-a phusu tile ighi nani.

¹⁵Aqhaqhono tilehi apusu pesu ayikhu ikhu, ati khophe eno tipaqo tuchomujo nani. Aluqu lakhikhino ighi puzu tilehi kumqo nani.

¹⁶AMPEU wu lhoxu xuakemi kakulo lhejulo eno tipauno kiu piani keno phijulo. Lhoxu hipaqo lakhimu kuhavekeu shimo nani eno tipaqo lakhimu pututa kusau kuhakeu shimo nani. AMPEU no titoi shipenikeu shi ahza tsupuani, pa ampino tipaqo sawo kumqo nani.

¹⁷Tipaqo gholo ayeghi kijepesu pututa saje tsunikeuye AMPEU no shi nani. Panonguno tiqheli lakhi lono tiqheli lakhi kutolo tishi acheuve nani eno ayeghiye alhokupuju tipaqow shive nani.