Read Sumi Naga ISAYA 40 Bible Online

ISAYA 40 - Sumi Naga bible

ISAYA 40

¹Ningu Lhou no piani, “Iwu timiqo lokughuno tsulo! Panoqo lokughunotsulo!

²Jerusalem lo akemiqo mukhano putsatsulo. Panoqo vilo panonguye adoku shuwa aghime shivea eno itehiye panoqo xine pevetsuake.”

³Asutsa lakhino igha pia ani; “AMPEU ghenguno kughunamoke alo alaghi lakhi kutolo! NiLhou ghenguno asayeqhalo ala shikimthelo!

⁴Abokhu kumtsu kulaqalo; Naghuto kumtsu jokumtsalo. Atoghi kumtsu kulaqave nani, eno kukokilei keua kumtsu jokumduve nani.

⁵Tileno AMPEU kimthe jukuvu pephe piye nani, eno timi kumtsuno tipau ithulu nani. AMPEU ampino hipau piqhipe puani.”

⁶Asutsa lakhino igha piani, “Atsape lakhi pesu asheshulo!” “Ivilo kiu tsape asheshulo pikya?” ipi ino iniju. “Asheshulo, tiye timi kumtsu atsuni toike; panonguye aghalo xamunu tohimu ngo chemoe.

⁷Kughou AMPEU no amlhu tipaqo shou fupukuni keno atsunino ighuive eno axamununo thibuive cheni. Timiye atsuni paphike.

⁸Atsunino ighuive cheni, axamununo thibuive cheni, ikemu niLhou tsaye alhokupuju ache nani.”

⁹O Jerusalem, naghuto kiqhelo ikulo eno lokivi sutsa pesu asheshulo! O Zion, asutsa kuloghi lono igha mukulo; atsakiviu pesu asheshulo! Piwolo eno musaichi kevilo. Juda lo taunqo vilo panongu Lhou chenike julo pilo!

¹⁰Julo, AMPEU Alhou no akuka lono ayehpenike cheni; julo, pano xapheluvekemi timiqo pa gholo sasu cheni.[7]

¹¹Bherikheu lakhi toi pano pawu alojimi heju nani; pano bheritiqo hekutsu pesu pa ulono khapeni; pano mukhano tipaqo paza sawuni.

¹²Khuuno auno shokeu lono azughi mighilu momu pa-u pesu atsutsu mighilu nani kya? Khuuno ayeghi ajukhulo sukhaluve momu akimighipulo naghuto ngo atoqo pesu mighilu nani kya?

¹³Khuuno AMPEU ye kiu shimasa keno pilunani kya? Khuuno pa shikapiye momu aku kumsu pa tsulu nani kya?

¹⁴Thwokha jeli kishi shive cheni keno vethalu, ithilu eno shikalunike ghenguno Alhou ye khuu sasu kuptsa kile ju kya?

¹⁵AMPEU ghenguno ashiayehqoye kiumu kumoke, azu kighiji nguno alaumu kumoe; zudo yeghiye amukhu toi lhalha lhaike.

¹⁶Libanon ghasulo lhoxu akeqo kumtsu niLhou lau agha shini keu luzulake, eno tile asubo akeqoye ami kuyi qunike mikheloke.

¹⁷Pa ghenguno ashiayehqoye kiumu kumoke.

¹⁸Kiuno Alhou sasu kimghi kulupu kya? Paye kiutoi kela kishi lhekulupu kya?

¹⁹Paye akumlamino ajulho shikeu toimoke, ayikumlamino tsandiyi pesu abo ghuno shunayi pesu kuzukeu toimoke.

²⁰Timi khuno tsandiyi momu shunayi me tsumlakeno tsumamo kepushi asu peitha cheni. Pano atshamgha shitsa shikemi phuno ikiqimo kepu julho lakhi shiniyeke.

²¹Nonguye mtha kesha? nongu vilo kha-ghino pimo kesha? Ayeghiye kishi huthu keno nonguye chimla kesha?

²²Tiye ayeghi ngo atsutsu nguno hukudau kunguu pa kuka lakhulo iqa akeuno mlake; timi aqhou akemiqoye alhache toi kititike. Pano aphi xachho akeshi atsutsu xachhoke, ngonikeu aphiki lakhi shiwoke toi.

²³Pano kukami akumghami sunhe qhike eno panoqo chunu puhaveke.

²⁴Panonguye atsuni lhothe ipeghi akelo eno ilalei akuhu qusupe akeu toike. Kughou AMPEU no amlhu mulhu peni keno, panonguye qhaive eno aghijini toi fupewuve cheni.

²⁵Khuuno akimthe Alhou sasu kimghi kulupu kya? pa toikeu kutau khuu ani kya?

²⁶Atsutsulo jupukulo! Ayepu nonguno ithulu akeuye khuuno lhophe kya? Ghushimi toi pano aqokitikhi shi sawukeu khije jehi ani keno pano ithi ani eno pano lakhikhi aje pi-ghi kucheni! Pano kukaye kijeke ghenguno tipaqo lakhimu hauvekeu shichemoe!

²⁷O Israil, tishiaye noye kushiye AMPEU ye owu shiluksa ithichemo kepi muchho cheni, momu achipi xakutha ithumlano imevekelo kishiveni kela picheni kya?

²⁸Nonguye mtha kesha? Nonguye chimla kesha? AMPEU ye alhokuthu achekeu Lhou ke; pano ayeghiqha lhopheke. Paye khilemu akulhoshive momu qeinaive chemo. Khunomu pa kukumsu vetha lukha chemoe.

²⁹Khunoqono miqemileyi eno kulho kugho shiveni keno pano shikumto cheni.

³⁰Khunoqono alhothe keno pano ghi miqemileyive cheni; apumi ghi lhoveno ikiqive cheni.

³¹Ikemu khunoqono kuphupenike AMPEU pukhubeni keno, panoqo kumto akithe shikithevekeu phulu nani. Panonguno aluqu toi achishibo pusu ikulu nani; panonguno po nani ikeghi qeinaikeu shimo nani; panonguno chewu nani ikeghi akulhoshi miqemilei mo nani.